Այսօր «Չենք լռելու» երիտասարդական նախաձեռնությունը տարածել է հաղորդագրություն, որում մասնավորապես ասված է.
Վերջին օրերին «Չենք լռելու» երիտասարդական նախաձեռնության շուրջ հերթական աբսուրդի թատրոնն են ուզում բեմականացնել: Մի խումբ անձինք իրենց առջև նպատակ են դրել գտնել նախաձեռնության, այսպես կոչված, «թիկունքը», ինչն ապարդյուն զբաղմունք է դրա բացակայության պատճառով: Այդ անիմաստ նպատակին հասնելու համար գործի է դրվել բոլորովին անիմաստ և որևէ հիմք չունեցող վարկածների տարածման մեթոդը:
Մեկ հայտարարություններ են տարածվում, որ «Չենք լռելու»-ն «ռուսական պռոյեկտ» է, հետո պարզվում է, որ նախաձեռնությունը «մեծ գումարներ» է ստանում պետդեպարտամենտից: Ոմանք հավաստում են, որ «Չենք լռելու»-ն բանակում առկա արատավոր երևույթների դեմ պայքարելու համար ֆինանսավորվում է Մայր աթոռի կողմից և հրավիրում բոլորին ցույցի Էջմիածնի տաճարի բակում: Հետո, որպես արգումենտ բերելով «Չենք լռելու»-ից դեռ մեկ ամիս առաջ զբաղվածության պատճառով դուրս եկած երիտասարդին տված շնորհակալագիրը, դեմքի լուրջ արտահայտությամբ համացանցով մեկ տարածում, թե «Չենք լռելու»-ին հովանավորում է հայ-ռուսական հարաբերություններոի զարգացմամբ զբաղվող գործիչներից մեկը:
Երեկ էլ ոմն նորահայտ խումբ հայտարարություն է տարածել` նշելով, որ «Չենք լռելու»-ն ամերիկյան դաշնակների կողմից է ֆինանսավորվում: Որպես այս մառազմի հիմնավորում բերվել է նախաձեռնության այն հայտարարությունը, որտեղ նշվում է, թե «Երկիր Մեդիան» միակ ալիքն է, որի եթերից «աղբ» չի թափվում: Հայտարարության հեղինակները կարծում են, որ այդ քայլով «Չենք լռելու»-ն ընտրություններից առաջ մարդկանց հուշում է դիտել «Դաշնակցության քարոզչությունը կատարող ալիքը»:
Այս ողջ անհեթեթությունը միայն «Չենք լռելու»-ի անկախությունը կասկածի տակ դնելու և նրա հեղինակությունը ստվերելու անազնիվ նպատակն է հետապնդում: Նախաձեռնությունը կոչ է անում հասարակությանը չտրվել իշխանությունների սպասարկուների կողմից տարածվող այս մառազմատիկ ապատեղեկատվությունների ազդեցությանը:
