Հայ ազգային կոնգրեսի մամլո խոսնակ Արման Մուսինյանը, «Առաջին լրատվականի» հետ զրույցում մեկնաբանելով այսօր «Ժառանգություն» կուսակցության ներկայացուցիչներ Ստեփան Սաֆարյանի և Ռուբեն Հակոբյանի հայտարարությունները, նշեց, որ Կոնգրեսի հասցեին հնչեցված մեղադրանքները ավելի քան անլուրջ են: Հիշեցնենք, որ «Ժառանգության» ներկայացուցիչները այսօր հայտարարել էին, թե ինչպես իշխանությունն է մենաշնորհել իշխանական դաշտը, այնպես էլ` Հայ ազգային կոնգրեսը մենաշնորհել է ընդդիմադիր դաշտը: Անդրադառնալով ԼՂ հարցին` Սաֆարյանը հայտարարել էր, թե ԼՂ հարցում «բառի բուն իմաստով «տորգ» է գնում»: «Թե՛ ընդդիմադիր, թե՛ իշխանական կուսակցությունները ուղղակի անհամաձայնություն են հայտնում, թե արդյո՞ք արժե «տորգը» այդ գնին, ինչը որ առաջարկվում է»,- ասել էին Ժառանգության ներկայացուցիչները: «Եթե ոմանց թվում է, թե Ղարաբաղի համար օգտակար գործ անելը Ղարաբաղի անկախությունը ճանաչելն է, ապա պետք է նշեմ, որ այդ մարդիկ ավելի քան մակերեսային պատկերացում ունեն ԼՂ հակամարտության, այն ի նպաստ Հայաստանի և Ղարաբաղի լուծելու, և ընդհանրապես հակամարտության խորության մասին: Ցավոք, մենք մեր պատմության ընթացքում հաճախակի ենք ականատես եղել խոսքերի, հայտարարությունների, որոնք իրար մեջ մրցակցել են «Ծովից ծով Հայաստան», «Սևրի պայմանագրով Հայաստան» գոռալու հարցում: Եթե դա է հայրենասիրությունը, մենք միգուցե պարտվել ենք: Բայց փորձը ցույց է տվել, որ Հայաստանի և Ղարաբաղի համար ծանրագույն պահերին այդ գոռացողների «իզն ու թոզը» չի եղել»,- հայտարարեց Մուսինյանը: Կոնգրեսի մամլո խոսնակը նաև հավելեց, որ 18 կուսակցություններից բաղկացած Հայ ազգային կոնգրեսը ձևակերպել է իր օրակարգը, ավելին` այն մշտապես բաց է եղել համագործակցության համար այդ օրակարգի շրջանակներում: «Եվ եթե նույնիսկ այս տարրական ռազմավարությունը դժվար է լինում ընկալել, ես միայն կարող եմ մաղթել բեղմնավոր պայքար այդ մոնոպոլիզացիայի դեմ»,- նշեց Մուսինյանը:
