Կոլորադոյի բնակիչ Միթչ Ջիլբերթը Լաս Վեգասի McCarran միջազգային օդանավակայանից թռչելիս է եղել տուն, երբ երկու ծրար է գտել, որոնց վրա Caesar’s Palace խաղատան և հյուրանոցի լոգոն է եղել: Ծրարներից յուրաքանչյուրում 5000 դոլար է եղել:
Ըստ USA Today–ի՝ չնայած գումարը պահելու գայթակղություն եղել է, բայց Ջիլբերթն ասել է, որ նման բան երբեք չէր անի: «Եթե դա ինձ հետ պատահեր, ես, անշուշտ, կուզենայի, որ գումարը վերադարձվեր: Բացի այդ, ես ցանկանում էի իմ երեխաներին ցույց տալ, որ հարկավոր է ճիշտ քայլ անել: Չնայած, որ հեշտ կլիներ գումարը պահել, բայց ես համենայն դեպս վստահ էի, որ ճիշտն այն վերադարձնելն է»:
Ջիլբերթը մի քանի անգամ զանգել է օդանավակայան և հայտնել, որ գումարը գտել է: Միայն երկու շաբաթ անց օդանավակայանից նրան ասել են, որ Մարքեզ անունով մի մարդ է կորցրել գումարը: Մարքեզը հայտնել է, որ գումարը շահել է խաղատանը, բայց քանի որ շտապելիս է եղել, որ չուշանա թռիչքից, ըստ երևույթին, ծրարներն ընկել են գրպանից:
