Ամերիկացի ռեժիսոր Աբել Ֆերարան՝ «Վտանգավոր խաղ», «Վատ լեյտենանտ» ֆիլմերի հեղինակը, պատրաստվում է ֆիլմ նկարել Արժույթի միջազգային հիմնադրամի (ԱՄՀ) նախկին տնօրեն Դոմինիկ Ստրոս Կանի շուրջը ծավալված սկանդալի մասին, որում գլխավոր հերոսին կմարմնավորի Ժերար Դեպարդյեն: Այս մասին հաղորդում է РИА «Новости»-ն՝ վկայակոչելով ամերիկյան ԶԼՄ-ներին:
Ֆիլմում կլինեն նաև էպիզոդներ այլ քաղաքական գործիչների կենսագրականներից, օրինակ՝ ԱՄՆ նախկին նախագահ Բիլ Քլինթոնի և Մոնիկա Լևինսկու սիրավեպից, Իտալիայի նախկին վարչապետ Սիլվիո Բեռլուսկոնիի կյանքից, որը բազմիցս ներքաշվել է սեքս-սկանդալների մեջ:
«Միակ բանը, որ կարելի է՝ այն է, որ Դեպարդյեն, Աջանին (դերասանուհի Իզաբել Աջանին.- 1in.am) և Ֆերարան շատ են ցանկանում միասին աշխատել: Բայց կստացվի՞ արդյոք ֆիլմը՝ մենք չգիտենք: Պարզ է միայն, որ նրանք ցանկանում են գրել ինչ-որ բան՝ կապված Ստրոս Կանի հետ… Խոսքը ինչ-որ ավելի մեծ բանի մասին է, քան նեղ իմաստով Ստրոս Կանի շուրջը ծավալված սկանդալը»,- բացատրում է Ֆերարայի պրոդյուսեր Վինսենտ Մարավալը:
Ենթադրվում է, որ Ժերար Դեպարդյեն կմարմնավորի գլխավոր հերոսին, իսկ Իզաբել Աջանին հանդես կգա նրա կնոջ դերում:
2011 թ. մայիսին ԱՄՀ տնօրեն Դոմինիկ Ստրոս Կանը ձերբակալվեց Նյու Յորքում. նա մեղադրվում էր հյուրանոցներից մեկի սպասուհու նկատմամբ սեռական ոտնձգություն իրականացնելու մեջ: Մի քանի օր անց Ստրոս Կանը կամավոր հեռացավ ԱՄՀ տնօրենի պաշտոնից:
