Եվրոպայում ստոմատոլոգների թվով Հայաստանի Հանրապետությունը զբաղեցնում է առաջին տեղը: Այս մասին այսօր լրագրողների հետ հանդիպմանը նշեց Ստոմատոլոգների ասոցիացիայի նախագահ Աշոտ Գևորգյանը:
«Խորհրդային Միության տարիներին մեր ստոմատոլոգների թիվը չէր գերազանցում 2-3 հազարը, իսկ այժմ նրանց թիվը կտրուկ աճել է: Եթե Ֆրանսիայում 10 հազար բնաչին բաժին է հասնում 6, Իսպանիայում` 5.5, ապա մեր դեպքում` 18 ստոմատոլոգ: Դա շատ բարձր ցուցանիշ է և բերում է միայն որակի անկման»:
Գևորգյանի համոզմամբ` դա պայմանավորված է այն հանգամանքով, որ այժմ թե մասնավոր բուհերում, թե համալսարանում շատ մեծ թվով ընդունելություն է լինում: Բոլոր նրանք, ովքեր ավարտում են բուհը, չնայած այն հանգամանքին, որ ունեն շատ ցածր գիտելիքներ, արդեն իրավունք ունեն աշխատելու որպես ստամատոլոգ:
Վերջինիս համար մտահոգիչ էր նաև այն փաստը, որ այժմ ՀՀ տարածքում ավելի քան 800 լիցենզավորված ստոմատոլոգիա կա, որից 600-ը` Երևանում, դեռ պարզ չէ` քանիսն էլ առանց լիցենզիայի: Նույնիսկ այս վիճակում նախարարությունը շարունակում է լիցենզիա տրամադրել ստոմատոլոգներին: Շաբաթական մոտ 5-6 ստոմատոլոգիա ստանում էն լիցենզիա:
Աշոտ Գևորգյանը ավելացրեց, որ այժմ համաշխարհային ճգնաժամի պատճառով ամբողջ աշխարհում 20-25 տոկոսով նվազել է ստոմատոլոգների մոտ մարդկանց հաճախելիությունը: Մեր երկրում այն հասնում է 50-60 տոկոսի: Պատճառն այն է, որ ոչ մի կերպ չի վերահսկվում գնային քաղաքականությունը, քանի որ ստոմատոլոգիաների 99 տոկոսը մասնավոր է:
