Առնվազն 19 մարդ մահացել է Սոմալիի հարավում կառավարական ուժերի և իսլամիստական «Ալ-Շաբաբ» խմբավորման զինյալների ընդհարման հետևանքով:
Ինչպես հայտնում է Press TV-ն, զինյալները զինվորների վրա հարձակվել են Գեդո մարզում` Քենիայի հետ սահմանային շրջանում: Ընդհարման ժամանակ սպանվել է 11 զինվոր, տասնյակները վնասվածքներ են ստացել, շարասյան ավտոմեքենաներից մեկն ամբողջությամբ վառվել է: Գեդոյի զինվորական հրամանատար Մուհամեդ Աբդի Քալիլը հայտնել է, որ իր ստորաբաժանմանը հաջողվել է հետ մղել հարձակումը, սպանել վեց զինյալի և առգրավել զենքը:
Վերջին ժամանակներս Սոմալիի ներկայացուցչական ուժերը, որոնք վերահսկում են միայն երկրի մի մասը, պայքարում են «Ալ-Շաբաբի» զինյալների դեմ, որոնց աջակցում են քենիական և եթովպիական զինվորականները:
Սոմալի հանրապետությունը դադարել է գոյություն ունենալ որպես մեկ միասնական պետություն 1991 թվականից՝ Սաիդ Բարեի բռնապետական վարչակարգի տապալումից հետո: Միջազգային հանրությունը որպես երկրի միակ օրինական իշխանություն ճանաչում է դաշնային կառավարությանը, որը վերահսկում է Մոգադիշոն և մի շարք հարակից տարածքներ:
Սոմալիի հարավում և հյուսիս-արևելքում կառավարում են տեղական կլանները և արմատական իսլամիստական շարժումները, այդ թվում՝ նաև «Ալ-Քաիդան», իսկ հյուսիսը և հյուսիսարևմտյան տարածքները զբաղեցնում են չճանաչված Սոմալիլենդ և Պունտլենդ պետությունները:
