Դեկտեմբերի 19-ին ՀՀ ԳԱԱ Բյուրականի աստղադիտարանում տեղի կունենան մի շարք իրադարձություններ:
Վերջերս ՅՈՒՆԵՍԿՕ-ի «Աշխարհի հիշողություն» ծրագրի միջազգային ռեգիստրում գրանցվել է աշխարհահռչակ աստղագետ Բենիամին Մարգարյանի իրականացրած բյուրականյան սպեկտրային շրջահայությունը:
Այդ կապակցությամբ տեղի կունենա շնորհանդես և ՅՈՒՆԵՍԿՕ-ի հավաստագրի հանձնումը: Այնուհետև կհանձնվեն Հայկական աստղագիտական ընկերության և Օքսֆորդի հայկական ընկերության սահմանած գիտական լրագրության 2011թ. մրցանակները, ինչպես նաև շնորհակալագրեր՝ առավել ակտիվ լրատվամիջոցներին:
Սուրճի ընդմիջումից հետո տեղի կունենա ՀԱԸ տարեկան համաժողովը, որի ընթացքում կլսվի ՀԱԸ համանախագահ Արեգ Միքայելյանի հաշվետվությունը ընկերության գործունեության վերաբերյալ, տեղի կունենան քննարկումներ:
Այնուհետև կհանձնվեն Բյուրականի աստղադիտարանի և ՀԱԸ համատեղ սահմանած լավագույն գիտական աշխատանքի համար տարեկան մրցանակը, ՀԱԸ երիտասարդ աստղագետների տարեկան (Երվանդ Թերզյանի անվան) մրցանակը և Գալիլեյան ուսուցիչների միջազգային ծրագրի հավաստագրերը:
Միջոցառման սկիզբը՝ դեկտեմբերի 19-ին` ժամը 12:00-ին, ՀՀ ԳԱԱ Բյուրականի աստղադիտարանի գլխավոր շենքում:
Երևանից Բյուրական աստղադիտարանի ավտոբուսը կմեկնի ժամը 11:00-ին ՀՀ ԳԱԱ նախագահության շենքի մոտից:
