Թուրքական Anadolu լրատվական գործակալության փոխանցմամբ՝ Թուրքիայի արտգործնախարար Ահմեդ Դավութօղլուն անդրադարձել է Ֆրանսիայի խորհրդարանի կողմից դեկտեմբերի 22-ին կայանալիք Հայոց ցեղասպանության հերքումը քրեականացնող օրինագծի դիտարկմանը.
«Դա անել (Հայոց ցեղասպանության հերքումը քրեականացնել) ցանկացողներն օժտված են «միջնադարյան» մտածելակերպով։ Ֆրանսիայում առկա այդ «միջնադարյան» մտածելակերպը Եվրոպայի «ամենամեծ սպառնալիքն» է։
Ֆրանսիան, որը երկար տարիներ խոչընդոտում է ԵՄ-ին Թուրքիայի անդամակցությանը, այս դեպքում էլ հանդես է գալիս ազատ արտահայտվելու «լիովին վերացման» նախաձեռնությամբ։ Դա «հակասում» է ֆրանսիական հեղափոխության դրույթներին, որի խորհրդանիշն է հանդիսացել ազատության ու ժողովրդավարության համար պայքարը»։
Հիշեցնենք, որ երեկ Թուրքիան Հայոց ցեղասպանության հերքումը քրեականացնող օրինագծի կանխման համար «քաղաքական դեսանտ» է գործուղել Ֆրանսիա, որի կազմում ներառվել են Թուրքիայի Ազգային մեծ ժողովի ներկայացուցիչները։
