Իր քաղաքական ակտիվությամբ այս տարի աչքի ընկավ հատկապես Հայ ազգային կոնգրեսը: Այսօր կայացած քննարկմանը այս մասին հայտարարեց Քաղաքական գիտությունների դոկտոր-պրոֆեսոր Գառնիկ Քեռյանը:
«Հայաստանում, սակայն, արտահերթ ընտրություններ տեղի չունեցան: Քաղաքական տարվա մյուս ուշագրավ երևույթը իշխանություն-ՀԱԿ երկխոսությունն էր, որի արդյունքում թեպետ ռեալ ձեռքբերումներ չգրանցվեցին, այնուամենայնիվ հարցը քաղաքական դաշտի մեխերից մեկն էր:
Մյուս կարևոր իրադարձությունը կարելի է համարել «Բարգավաճ Հայաստան» կուսակցության շուրջ ստեղծված իրավիճակը, նրա շուրջ եղած բազմաբնույթ խոսակցությունները»,- նկատեց նա:
Քեռյանի խոսքով` քաղաքական տարվա քննարկումների առարկա էր նաև երրորդ ուժի ստեղծման հավանականության թեման:
«Բայց այդ դիտարկումները վերջնական պատասխանի չարժանացան: Այս տարի միայն մեկ նոր կուսակցություն ունեցանք` «Ազատ դեմոկրատներ» կուսակցությունը, բայց կկարողանա՞ արդյոք այդ կուսակցությունը կատարել երրորդ ուժի դերը` ցույց կտան միայն ընտրությունները:
Տարվա հաջորդ կարևոր իրադարձությունը վերին էշելոններում կադրային փոփոխությունների հարցն էր: Ինչ վերաբերում է իշխանությունների վարած արտաքին քաղաքականությանը և մասնավորապես ղարաբաղյան հարցի կարգավորման խնդրին, ապա կարծում եմ, որ Հայաստանը բավական ամուր դիրքեր ունի, իսկ Ադրբեջանի քարոզչությունը, թե ՀՀ-ն ագրեսոր երկիր է, ի չիք է դառնում: Կարծում եմ`մինչև 2021 թվականի աշուն ստատուս-քվոն կարող է պահպանվել:
Նախընտրական տարում ԱՄՆ-ը կտրուկ քաղաքականության և նախաձեռնությունների չի դիմի»,- ամփոփեց Քեռյանը:
