Թուրքական Anadolu գործակալության փոխանցմամբ՝ Թուրքիայի Ազգային մեծ ժողովի (ԹԱՄԺ) նախագահ Ջեմիլ Չիչեքն Ադրբեջանի նախկին նախագահ Հեյդար Ալիևի մահվան 8-րդ տարելիցի կապակցությամբ Անկարայում կազմակերպված միջոցառման ժամանակ անդրադարձել է հայ-թուրքական հարաբերությունների կարգավորմանը և Հայոց ցեղասպանության միջազգային ճանաչմանը.
«Հայ-թուրքական հարաբերությունների կարգավորման անփոփոխ նախապայմանը շարունակում է մնալ «ադրբեջանական տարածքների օկուպացիային» վերջ դնելը։ Մեր ամենաառաջնահերթ նպատակներից մեկը «ադրբեջանական տարածքների» վերադարձն է։ Լեռնային Ղարաբաղը Կովկասի անվտանգության ու կայունության համար ամենամեծ սպառնալիքն է։
Բոլոր պետություններին ու միջազգային կառույցներին կոչ եմ անում ստիպել Հայաստանին՝ վերջ դնելու «օկուպացիային»։ Որ տեսանկյունից էլ որ նայում ենք, հայ-թուրքական հարաբերությունների կարգավորման նախապայմանը դա է։
Հայաստանը երկար ժամանակ պնդում է Ցեղասպանության շուրջ։ Դա վերածվել է քաղաքական կամպանիայի, և ներկայումս մի շարք երկրների խորհրդարաններ այդ կապակցությամբ որոշումներ են ընդունել ու ընդունում, որոնցում խոսք է գնում 100 տարի առաջվա իրադարձությունների մասին։ Մենք էլ ասում ենք, որ եթե պետք է անդրադառնալ անցյալի պատմական խնդիրներին, ապա այդ գործընթացը «պետք է սկսել» Հայաստանից, որը «օկուպացրել է ադրբեջանական» տարածքները»։
Հիշեցնենք, որ օրեր առաջ Չիչեքի հետ ունեցած հանդիպման ժամանակ ԱՄՆ փոխնախագահ Ջոզեֆ Բայդենը հույս էր հայտնել, որ ԹԱՄԺ-ը քայլեր կձեռնարկի հայ-թուրքական արձանագրությունների վավերացման ուղղությամբ։
Ի դեպ, Ջեմիլ Չիչեքը դասվում է թուրք քաղաքական գործիչների ծայրահեղ հակահայկական թևին՝ հանդիսանալով քրեական օրենսգրքի տխրահռչակ 301-րդ հոդվածի կնքահայրերից ու ջատագովներից մեկը, ինչի համար էլ ստացել է «301-րդ Ջեմիլ» մականունը:
