Հայաստանի գլխավոր դատախազության մամուլի ծառայությունից «Առաջին լրատվական»-ին տեղեկացնում են, որ Հայաստանի գլխավոր դատախազի տեղակալ Արմեն Դանիելյանն այսօր` դեկտեմբերի 12-ին, ընդունել է ՀՀ գլխավոր դատախազության շենքի մոտ բողոքի ակցիա կազմակերպած «Ընդդեմ կանանց բռնության կոալիցիայի» ներկայացուցիչներին, այդ թվում նախկին ամուսնու կողմից տուժած Մարիամ Գևորգյանին:
Վերջինններս գլխավոր դատախազի տեղակալին են հանձնել գրություն` ուղղված ՀՀ գլխավոր դատախազին՝ ներկայացնելով իրենց մտահոգությունը Մ.Գևորգյանի և Մ.Բ.-ի նկատմամբ ամուսնության ընթացքում կիրառված բռնությունների կապակցությամբ հարուցված քրեական գործի ընթացքի նկատմամբ:
Հանդիպմանը մասնակցել են նաև ՀՀ գլխավոր դատախազության մարդու դեմ ուղղված հանցագործությունների գործերով վարչության պետ Վ.Շահինյանն ու տվյալ քրեական գործի նկատմամբ դատավարական հսկողություն իրականացնող դատախազ Ա.Մարուխյանը, ովքեր մանրամասն ներկայացրել են քրեական գործով ձեռք բերված ապացույցները, նշանակված դատաբժշկական փորձաքննությունների եզրակացությունները, ծեծի ենթարկված աղջիկների հարցաքննությունների, ինչպես նաև նախկին ամուսնու՝ Դավիթ Զիրոյանի հետ առերես հարցաքննությունների ընդհանուր բովանդակությունը:
Հատուկ անդրադարձ է եղել գործով որպես մեղադրյալ ներգրավված անձանց գործողություններին տրված քրեաիրավական գնահատականների հիմքերին, տրվել պարզաբանումներ:
Ա.Դանիելյանը փաստել է, որ նշված քրեական գործը գտնվում է ՀՀ գլխավոր դատախազի անմիջական հսկողության ներքո և տրվել են հստակ ցուցումներ` քրեական գործով օբյեկտիվ իրականությունը պարզելու եւ մեղավոր անձանց գործողություններին պատշաճ և համարժեք իրավական գնահատական տալու համար:
Միաժամանակ տեղեկացրել է, որ հիմնական մեղադրյալը՝ Հայկանուշ Միքայելյանը, ով գտնվում էր հետախուզման մեջ, հայտնաբերվել և կալանավորվել է Սանկտ Պետերբուրգում, իսկ Հայաստան կտեղափոխվի դեկտեմբերի 12-ի երեկոյան:
Մինչ այդ՝ դեկտեմբերի 9-ին, գլխավոր դատախազի տեղակալ Մ. Սարգսյանի ստորագրությամբ գրավոր հանձնարարվել է Արարատի մարզի դատախազին՝ վերսկսել քրեական գործի վարույթը և քննարկման առարկա դարձնել մամուլի հրապարակումները, քանզի հոդվածներում տեղ են գտել այնպիսի հանգամանքներ, փաստեր, որոնք մինչ այդ քննությանը հայտնի չեն եղել, բայց կարող են էական նշանակություն ունենալ ինչպես քրեական գործով արարքների ճիշտ որակման, այնպես էլ քրեական գործի վերջնական ընթացքի լուծման համար:
Ա. Դանիելյանը վստահեցրել է, որ դատախազությունն իր գործառույթների շրջանակներում հետամուտ է լինելու նախաքննության բազմակողմանիության և օբյեկտիվության պահպանմանը և որ նախաքննական մարմինը կաշկանդված չէ նախկինում կայացված որոշումներով:
