Իտալական ֆիլմերի փառատոնի բացման արարողությունը տեղի կունենա Համազգային պետական թատրոնում դեկտեմբերի 19-ին:
Ինչպես տեղեկացնում է «Ազատություն» ռադիոկայանը, ֆիլմերը կցուցադրվեն մինչև դեկտեմբերի 25-ը:
Հայաստանում Իտալիայի դեսպան Բրունո Սկապինին մեծ ուրախությամբ է 2-րդ անգամ համագործակցում Համազգային թատրոնի հետ:
«Չափազանց ուրախ ու գոհ եմ, որ հնարավորություն ունեմ ներկայացնելու իտալական կինոյի 2-րդ փառատոնը: Այն ընդգրկվում է Հայաստանի և Իտալիայի միջև առկա մշակութային համագործակցության ծրագրերում:
Մենք շատ ոգևորվեցինք 2010 թ. ֆիլմերի փառատոնի հաջողությամբ ու դրանից ելնելով որոշեցինք նաև այս տարի կազմակերպել նմանատիպ շաբաթ:
Հուսով եմ, որ նաև ապագայում` հաջորդ տարիներին, նույնպես մենք այդ ավանդույթը կպահպանենք», – ասել է Իտալիայի դեսպանը:
Ֆիլմերի ընտրության ժամանակ ուշադրություն են դարձրել սոցիալական խնդիրների հետ կապված թեմաներին: Հիմնականում ցուցադրվելու են կինոարվեստի և հասարակության սոցիալական տարբեր խավերի միջև գոյություն ունեցող կապն արտացոլող ֆիլմեր:
«Ազատութունը» տեղեկացնում է, որ լուսանկարիչ Վահե Մելքոնյանին հնարավորություն է ընձեռվել փառատոնի ընթացքում ցուցադրել դեռ 2008թ. Հռոմում արված լուսանկարները: Շարքը կրում է «Հյուրընկալ Հռոմ» անվանումը:
«Հռոմում կարելի է 10 տարի շարունակ ամեն օր նկարել ու չկրկնվել: Ուստի, իմ կարծիքով, 10 օրն էլ էր քիչ Հռոմի` նույնիսկ մի թաղամասը ամբողջությամբ ներկայացնելու և իտալացու բնույթը ցույց տալու համար»,- ասել է Վ. Մելքոնյանը:
