Ֆրանսիայի նախագահ Նիկոլա Սարկոզին մեկնաբանել է Իսրայելի վարչապետ Բենյամին Նեթանյահուի հասցեին G20-ի գագաթնաժողովին արված իր արտահայտությունը:
Ինչպես հաղորդում է իսրայելական Haaretz թերթը, Սարկոզին նշել է, որ Օբամայի հետ զրույցում նա Իսրայելի վարչապետին «սուտասան» է անվանել, քանի որ վերջինս հրաժարվել է ընդունել Ֆրանսիայի միջնորդությունը իսրայելցի զինվոր Գիլադ Շալիտի ազատության գործում:
Ֆրանսիայի նախագահն Իսրայելի ղեկավարությանը բացատրել է, որ դուրս է եկել ափերից, երբ Նեթանյահուն հրաժարվել է Շալիտին ազատելու սխեմայում ընդգրկել ֆրանսիական օդուժի ինքնաթիռներ, չնայած Շալիտը ունի նաև Ֆրանսիայի քաղաքացիություն:
Բացի այդ, Իսրայելը թույլ չի տվել Ֆրանսիայի դեսպանին մասնակցել Շալիտին դիմավորելու արարողությանը, ինչն ավելի է սրել Ելիսեյան պալատի դժգոհությունը:
Արդյունքում՝ ԱՄՆ նախագահի հետ մասնավոր զրույցի ժամանակ, կարծելով, թե իրեն ոչ ոք չի լսում, Սարկոզին ազատություն է տվել զգացմունքներին և քննադատել Իսրայելի վարչապետին: Մասնավորապես՝ Սարկոզին ասել էր, որ Նեթանյահուն սուտասան է և ինքը չի կարողանում նրան տանել: Ի պատասխան՝ Օբաման նշել էր, որ ինքը ստիպված է լինում անընդհատ գործ ունենալ Նեթանյահուի հետ: Սակայն զրույցի ժամանակ նախագահների բարձրախոսները միացված է եղել, և լրագրողները լսել են նրանց խոսակցությունը:
Ավելի ուշ Սարկոզին հավատացրել էր Իսրայելի վարչապետին, որ, չնայած Մերձավոր Արևելքի հարցում իրենց ունեցած տարաձայնություններին, ինքը բարեկամաբար է տրամադրված նրա նկատմամբ:
Իսրայելցի զինվոր Գիլադ Շալիտը պաղեստինցիների կողմից գերի է վերցվել 2006 թ.: 2011 թ. ավելի քան 1000 պաղեստինցի բանտարկյալների ազատարձակման դիմաց նրան բաց թողեցին:
