Հայաստանում խոսքի ազատությունն աստիճանաբար ընդլայնվում է. դա ինչպես հայաստանյան իշխանությունների, այնպես էլ Մարդու իրավունքների եվրոպական դատարանի նախադեպային պրակտիկայի շնորհիվ է: Այսօր կայացած «Եվրոպական միության ջանքերը խոսքի ազատության ամրապնդման ոլորտում» խորագրով համաժողովին նման տեսակետ հայտնեց ԵՄ փորձագետ, Ժան Մուլեն Լիոն 3 համալսարանի հանրային իրավունքի ավագ դասախոս Լորան Էկը:
«Բայց պետք է ասել, որ խոսքի ազատությունը Հայաստանում շատ փխրուն է, ուստիև պետք է մշտական զգոնություն պահպանել: Նույնիսկ ժողովրդավարական մեծ ավանդույթ ունեցող երկրներում խոսքի ազատությունը կարող է վտանգվել»,- նկատեց նա` հավելելով, որ խոսքի ազատությունը բոլոր հիմնարար ազատությունների մեջ ամենահիմնականներից է:
Էկը ոգևորված էր համաժողովին մեծ թվով հայ երիտասարդների մասնակցությամբ` նկատելով, որ նրանք են վաղը ապահովելու խոսքի ազատությունը:
Համաժողովի մյուս բանախոս, Հայաստանում Ֆրանսիական համալսարանի գլխավոր քարտուղար Ալեքսանդր Մարտինետին իր հերթին ևս նկատեց, որ Հայաստանում խոսքի ազատությունն իսկապես փխրուն հիմքերի վրա է:
«Խոսքի ազատությունը իսկապես փխրուն է: Հայաստանն, անշուշտ, ամուր ժողովրդավարական հիմքեր ունեցող երկիր չէ, որովհետև նրա անկախությունն ընդամենը 20 տարվա պատմություն ունի: Սակայն հայաստանյան իշխանությունները աստիճանաբար, միջազգային կառույցների հետ սերտ համագործակցության արդյունքում համապատասխան օրենսդրություն են ներդնում երկրում: Բայց կրկնում եմ` խոսքի ազատությունը փխրուն է, և անգամ Ֆրանսիան չի կարողանում խուսափել որոշակի շեղումներից: Այնպես որ` մենք այստեղ դաս տվողներ չենք»,- նկատեց նա:
Ինչպես ասաց Մարտինետին` ինքը Ֆրանսիայի ԱԳՆ կողմից գործուղվել է Հայաստան` Ֆրանսիական համալսարանում համակարգելու հայ-ֆրանսիական համագործակցությունը:
«Համաժողովի անցկացման վայր Եվրամիության պատվիրակությունը հատկապես ընտրել է Հայաստանում Ֆրանսիական համալսարանը` որպես Հայաստանի ու ԵՄ համագործակցության տարբեր ոլորտները վեր հանող հաստատություն: Այս համաժողովի նպատակն է ներկայացնել Հայաստան-ԵՄ համագործակցությունը` դրան մասնակից դարձնելով նաև քաղաքացիական հասարակությանը: Հուսով եմ` նման քննարկումները անպայման արդյունք կունենան: Սա, միաժամանակ, երկարաժամկետ աշխատանք է»,- ամփոփեց նա:
