Թուրքիան կարող է 2014թ. հրաժարվել ԵՄ-ին անդամակցելու մտադրությունից. The New York Times

Թուրքական Ankara լրատվական գործակալությունը, վկայակոչելով ամերիկյան The New York Times թերթին, հայտնում է, որ թուրք պաշտոնյաները մասնավոր զրույցներում ընդգծում են, որ եթե մինչև 2014 թվականն առաջընթաց չգրանցվի ԵՄ-ին Թուրքիայի անդամակցության գործընթացում, ապա Թուրքիան կարող է հրաժարվել դրանից։

Ամերիկյան թերթն ուշադրություն է հրավիրում Եվրոպայում տնտեսական ճգնաժամի վրա, ինչը հանգեցրել է Եվրոպայի ազդեցության նվազեցմանը։ Արդյունքում կարող է այնպես ստացվել, որ վերջնական արդյունքում ոչ թե Եվրոպան կհրաժարվի Թուրքիայից, այլ Թուրքիան՝ Եվրոպայից։

Հիշեցնենք, որ ներկայումս թուրքական կողմը (վարչապետ Էրդողան, արտգործնախարար Դավութօղլու) սպառնում է սառեցնել ԵՄ-ի հետ իր հարաբերությունները, եթե մինչև հաջորդ տարի, երբ Կիպրոսը կստանձնի ԵՄ-ի նախագահությունը, առաջընթաց չգրանցվի կիպրական հարցի կարգավորման գործընթացում։