Այս տարի Հայ կոմպոզիտորական արվեստի փառատոնի` «Բաբաջանյան ֆեստ»-ի շրջանակում կկայանա 6 համերգ:
Դեկտեմբերի 5-ին` ժամը 19:00-ին, Առնո Բաբաջանյան համերգասրահում տեղի կունենա փառատոնի երրորդ համերգը:
Համերգային ծրագրում կհնչեն Հովհաննես Մանուկյանի «Սկիզբ և շարժում դաշնամուրի համար» ստեղծագործությունը (մենակատար` Հովհաննես Մանուկյան, դաշնամուր), Էդուարդ Սադոյանի Սոնատ ջութակի և թավջութակի համար գործը (մենակատարներ`Ստեփան Խալաթյան, ջութակ, Գառնիկ Ենգիբարյան, թավջութակ), Աշոտ Ղազարյանի Հինգ ծրագրային պիես երկու կլարնետի համար ստեղծագործությունը (մենակատարներ` Արթուր Խաչատրյան, կլարնետ, Նարեկ Հարությունյան, կլարնետ, Արզաս Ոսկանյանի Երգ ու պար երկու ալտի համար գործը (մենակատարներ` Սիրարփի Սամվելյան, ալտ, Անի Թորոսյան, ալտ):
Համերգին ելույթ կունենա նաև Հայաստանի պետական կամերային երգչախումբը` գեղարվեստական ղեկավար և գլխավոր դիրիժոր Ռոբերտ Մլքեյան:
Մենակատարներ Սոֆյա Միքայելյանն ակապելլա կկատարի «Այսօր գոլով ի Բեթանիայ»-ն` գրված կանացի երգչախմբի համար, Վլադիլեն Բալյանը` «Կուզեմ հիմի փչե զուռնեն»` գրված Եղիշե Չարենցի բանաստեղծության հիման վրա:
Ջենի Ասատրյանը համերգին ակապելլա կկատարի «Աքասիաներու շուքին տակ» ստեղծագործությունը` ըստ Միսաք Մեծարենցի, Մելիք Մավիսակալյանը` «Վասպուրականի երգեր» խմբերգային շարք:
«Բաբաջանյան ֆեստի» հերթական համերգները կկայանան դեկտեմբերի 11-ին Առնո Բաբաջանյան համերգասրահում, իսկ դեկտեմբերի 15-ին և 19:00-ին` Արամ Խաչատրյան համերգասրահում ժամը 19:00-ին:
Փառատոնն անցկացվում է ՀՀ նախագահ Սերժ Սարգսյանի բարձր հովանու ներքո:
«Բաբաջանյան ֆեստ»-ի կազմակերպիչներ են ՀՀ մշակույթի նախարարությունը, Հայաստանի կոմպոզիտորների ու երաժշտագետների միությունը և Հայաստանի պետական երիտասարդական նվագախումբը (գեղարվեստական ղեկավար և գլխավոր դիրիժոր` Սերգեյ Սմբատյան):
