Թուրքական Internet Haber կայքի փոխանցմամբ՝ Թուրքիայի նախագահ Աբդուլլահ Գյուլը, պատասխանելով լրագրողների հարցերին, անդրադարձել է հարևան Սիրիայում տիրող ճգնաժամին.
«Թուրքիան կորցրել է իր նախկին դաշնակից Սիրիայի ու նրա նախագահ Բաշար Ալ-Ասադի ռեժիմի հանդեպ ունեցած վստահությունը։ Մեր օրերում Ասադի նման ավտորիտար ռեժիմներն անընդունելի են և գտնվում են փակուղում։ Չնայած ներկայումս սիրիական զարգացումներն ընթանում են վատագույն սցենարով, Թուրքիան չի միջամտելու հակամարտությանը։
Մենք չենք ցանկանում միջամտել Սիրիայի ներքին գործերին, սակայն չենք էլ կարող անտարբերություն ցուցաբերել սիրիական ժողովրդի նկատմամբ։ րա հետ մեկտեղ, Թուրքիան չի աջակցի Սիրիայի գործերին երրորդ երկրների միջամտությանը, և ինքն էլ չի վարի այդպիսի քաղաքականություն։ Բայց եթե Թուրքիայի շահերը հայտնվեն սպառնալիքի տակ, ապա մենք ստիպված կլինենք պաշտպանել մեզ»։
Հիշեցնենք, որ երեկ էլ Թուրքիայի վարչապետ Էրդողանը հայտարարել էր, որ կգա օրը, երբ Ասադը կլքի զբաղեցրած պոստը, քանի որ այդ պոստերը հավերժ չեն զբաղեցվում. «Մենք չենք ընդունում առավել մարդկային կյանք պահանջողների նկատմամբ տանկերի ու զենքի գործադրումը։ Եթե Ասադն այդքան վստահ է, ապա նա պետք է անցկացնի ընտրություններ և դրանց արդյունքներով դառնա նախագահ»։
