News Georgia-ի փոխանցմամբ՝ նոյեմբերի 23-ին՝ «Վարդերի հեղափոխության» 8-րդ տարեդարձի օրը, Թբիլիսիի կենտրոնում տեղի է ունենալու ԱՄՆ 40-րդ նախագահ Ռոնալդ Ռեյգանի հուշարձանի հանդիսավոր բացումը։
Այդ հուշարձանը նվիրված է լինելու Խորհրդային միության փլուզման 20-ամյակին։ Հուշարձանի վրա վրացերենով ու անգլերենով փորագրված են լինելու Ռեյգանի հետևյալ խոսքերը. «Ազատությունը պետք է լինի յուրաքանչյուր սերնդի խնդիրը»։
Բրոնզյա քանդակը Ռեյգանին պատկերում է հասակով մեկ։ Կիրակի օրն այն բերվել է նշանակման վայր, ուր ներկայումս ընթանում են տեղադրման աշխատանքները։ Հեղինակը վրացի քանդակագործ Ավթանդիլ Մոնասելիձեն է, որը երեք տարի շարունակ աշխատել է քանդակի վրա։
Քանդակագործի խոսքերով՝ Ռեյգանը վիթխարի ներդրում է ունեցել մարդկության պատմության մեջ՝ մասնակցելով Խորհրային միության փլուզմանը։
Հիշեցնենք, որ Ռեյգանն ԱՄՆ-ի նախագահի պաշտոնում գտնվել է 1981-1989 թվականներին։ Նա մահացել է 2004 թվականի հունիսի 5-ին Լոս Անջելեսում։
