Հայ կոմպոզիտոր Առնո Բաբաջանյանի 90-ամյա հոբելյանի շրջանակներում Երևանում նոյեմբերի 21-ից դեկտեմբերի 19-ը կանցկացվի «Բաբաջանյան-ՖԵՍՏ» հայ կոմպոզիտորական արվեստի փառատոնը: Կազմակերպիչներն են ՀՀ մշակույթի նախարարությունը, Հայաստանի կոմպոզիտորների և երաժշտագետների միությունը և Հայաստանի պետական երիտասարդական նվագախումբը:
Ինչպես «Առաջին լրատվական»-ին տեղեկացրեցին նվագախմբի մամուլի ծառայությունից, փառատոնի շրջանակներում կկայանա 6 համերգ:
Բացման արարողությունը տեղի կունենա «Արամ Խաչատրյան» համերգասրահում նոյեմբերի 21-ին: Ծրագրում կհնչեն Առնո Բաբաջանյանի 3 ստեղծագործություններ` «Արիա-վոկալիզը»` մենակատար` Սյուզաննա Մելքոնյան (սոպրանո), թավջութակի կոնցերտը` մենակատար Արամ Թալալյան (թավջութակ), «Հերոսական բալլադ» դաշնամուրի և նվագախմբի համար` մենակատար Արմեն Բաբախանյան (դաշնամուր):
Հայ կոմպոզիտորական արվեստի փառատոնի`«Բաբաջանյան ՖԵՍՏ»-ի հերթական համերգները կկայանան նոյեմբերի 22-ին, դեկտեմբերի 5-ին և 11-ին՝ «Առնո Բաբաջանյան» համերգասրահում, իսկ դեկտեմբերի 15-ին և 19-ին՝ «Արամ Խաչատրյան» համերգասրահում, ժամը 19-ին:
Փառատոնի փակմանը`դեկտեմբերի 19-ի համերգին, կհնչեն Առնո Բաբաջանյանի ճանաչված երգերը Հայաստանի պետական երիտասարդական նվագախմբի՝ գեղարվեստական ղեկավար և գլխավոր դիրիժոր Սերգեյ Սմբատյան, և հայտնի էստրադային երգիչ-երգչուհիների կատարմամբ:
