Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է ԱՄՆ գյուղդեպարտամենտի ներկայացուցիչ Մայքլ Ստայներին և ԵՄ «Աջակցություն Հայաստանի ազգային վիճակագրական ծառայությանը» ԹՎԻՆԻՆԳ ծրագրի մշտական խորհրդատու, Դանիայի վիճակագրական ծառայության ներկայացուցիչ Թոմաս Բիին:
Հանդիպմանը մասնակցել է նաև ՀՀ ազգային վիճակագրական ծառայության նախագահ Ստեփան Մնացականյանը:
Քննարկվել են Հայաստանում գյուղատնտեսական համատարած հաշվառում (ԳՀՀ) անցկացնելու հնարավորություններին վերաբերող հարցեր:
ՄԱԿ-ն առաջարկում է ԳՀՀ անցկացնել յուրաքանչյուր տասը տարվա կտրվածքով:
ԳՀՀ անցկացվում է ՄԱԿ-ի անդամ շատ, այդ թվում` ԱՊՀ երկրներում:
ՄԱԿ-ի անդամ երկրների համար ԳՀՀ արդյունքները համարվում են ոլորտի վերաբերյալ տեղեկատվության միակ աղբյուրը, և տվյալները կարող են օգտագործվել գյուղատնտեսության ոլորտում քաղաքականություն և ծրագրեր մշակող պետական մարմինների, ծրագրեր իրականացնող կազմակերպությունների, հետազոտող ընկերությունների կողմից:
ԳՀՀ-ն համարվում է յուրովի ներդրում, որը հետագայում նպաստելու է գյուղատնտեսության ու գյուղական վայրերի զարգացմանը և կարևորվում է նաև պարենային անվտանգության տեսնակյունից:
Հյուրերն առաջարկել են Հայաստանում նման միջոցառում անցկացնել առաջիկայում` օգտագործելով այս տարվա հոկտեմբերին անցկացված մարդահամարի ռեսուրսները:
Փոխվարչապետը կարևորել է ԳԳՀ նշանակությունը` պատրաստակամություն հայտնելով շահագրգիռ մարմինների, այդ թվում` միջազգային դոնոր կազմակերպությունների հետ քննարկել միջոցառման կազմակերպմանն ու անցկացմանը վերաբերող հարցեր:
Ա. Գևորգյանն առաջարկել է շահագրգիռ պետական և հասարակական կազմակերպությունների ներգրավմամբ իրականացնել տեղեկատավական արշավներ:
Հյուրերը ողջունել են տեղեկատվական արշավների կազմակերպման գաղափարը` նշելով, որ թե՛ ՄԱԿ-ը, թե՛ ԵՄ-ն պատրաստակամ կլինեն համագործակցել Հայաստանի հետ այս խնդրում:
