Հարավկորեական Samsung ընկերությունը Գերմանիայի շուկայի համար մոդիֆիկացրել է Galaxy Tab 10.1 պլանշետային համակարգիչները:
Ինչպես գրում է Cnet պարբերականը, սեպտեմբերին Գերմանիայի դատարանը արգելել էր Samsung Galaxy Tab 10.1 պլանշետների վաճառքը իր երկրի տարածքում: Apple-ը դատարանում հաղթել էր Samsung-ի դեմ ներկայացրած հայցը, որում հարավկորեական ընկերությանը մեղադրել էր իր iPhone և iPad սարքավորումների դիզայնի կրկնօրինակման մեջ` պահանջելով դադարեցնել Samsung-ի սարքավորման վաճառքը Գերմանիայում: Արգելքը վերաբերում էր միայն Գերմանիայի տարածքում վաճառվող սարքավորումներին, սակայն դատարանը վճռել էր վաճառքը արգելել ԵՄ այլ երկրներում ևս:
Galaxy Tab 10.1n թարմացված ապրանքի թողարկման նախագծերի մասին առաջին անգամ հայտնել է գերմանական MobiFlip կայքը: Աղբյուրների տվյալներով՝ Samsung-ի նոր պլանշետի դիզայներական տարբերությունը մետաղական օղագոտին է: Այլ փոփոխությունների մասին չի հայտնվում:
Հիշեցնենք, որ Samsung և Apple ընկերությունների վիճաբանությունը սկսվել է այս տարվա ապրիլից, երբ Apple-ը առաջին անգամ հարավկորեական ընկերությանը մեղադրեց իր սարքավորումների դիզայնի կրկնօրինակման մեջ: Apple-ը աշխարհի տարբեր երկրներում ներկայացրել է 20 հայց, մինչ այս դատարանները կանգնել են Apple-ի կողքին:
Միևնույն ժամանակ, Samsung-ը Apple-ի նկատմամբ Եվրոպայում, Ավստրալիայում և Ճապոնիայում հանդես է եկել պատասխան հայցով` Apple-ին մեղադրելով արտոնագրերի խախտման մեջ:
