ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ նոյեմբերի 12-ին Ֆրանսիայում ՀՀ դեսպան Վիգեն Չիտեչյանն աշխատանքային այցով մեկնել է Վանդեա` մասնակցելու Հայաստանի անկախության 20-ամյակին նվիրված հանդիսություններին:
Հանդիսությունները նախաձեռնել էր «Վանդեա-Հայաստան» ընկերությունը` նախագահ Ֆրանսուազ Գովցյանի գլխավորությամբ:
Նահանգի կենտրոն հանդիսացող Ֆոնտենե-լը-Կոնտ քաղաքի Maison Billaud սրահում բացվել է Ժան-Միշել Բերցի «Հայաստանի լույսը» խորագրով ֆոտոցուցահանդեսը, որին ներկա է եղել քաղաքապետ Հյուգ Ֆուրաժը:
Դեսպանը քաղաքապետին ներկայացրել է հայ-ֆրանսիական ապակենտրոնացված մակարդակով համագործակցության հարուստ փորձը և ցանկություն հայտնել, որ Ֆոնտենե-լը-Կոնտը ևս միանա Հայաստանի հետ համագործակցության կապեր հաստատած ֆրանսիական 30 քաղաքներին ու շրջաններին:
Նույն օրը երեկոյան տեղի է ունեցել հանդիսավոր ընդունելություն, որին մասնակցել են Վանդեա նահանգի գլխավոր խորհրդի նախագահ, սենատոր Բրունո Ռետայոն և փոխնախագահ, Ֆրանսիայի Ազգային ժողովում Ֆրանսիա-Հայաստան պատգամավորական խմբի անդամ Դոմինիկ Սուշեն:
Ելույթներով հանդես են եկել ՀՀ դեսպան Վիգեն Չիտեչյանը, Բրունո Ռետայոն, Դոմինիկ Սուշեն և Վանդեա-Հայաստան ընկերության նախագահ Ֆրանսուազ Գովցյանը:
ՀՀ դեսպանն իր ելույթում հույս է հայտնել, որ առաջիկա տարիներին Վանդեայի և Հայաստանի միջև փոխշահավետ ապակենտրոնացված համագործակցությունը կշարունակի զարգանալ:
Վանդեայի նահանգը գլխավոր խորհրդի նախորդ նախագահ Ֆիլիպ դը Վիլիեի օրոք ակտիվ համագործակցության կապեր է հաստատել Հայաստանի հետ:
Ամեն տարի Վանդեայի ձեռնարկություններն ուսումնական պրակտիկայի նպատակով հյուրընկալում են Հայաստանի Ֆրանսիական համալսարանի ուսանողներին:
