Իսրայելի վարչապետ Բենյամին Նեթանյահուն ավելի ճանաչված է ԱՄՆ-ում, քան Սպիտակ տան ղեկավար Բարաք Օբաման: Այս մասին են վկայում Greenberg Quinlan Rosner ընկերության անցկացրած սոցիոլոգիական հարցումների արդյունքները:
Ինչպես հաղորդում են իսրայելական ԶԼՄ-ները, հարցմանը մասնակցել են ԱՄՆ 800 քաղաքացիներ, որոնց խնդրել են պատասխանել ԱՄՆ-ին, Իսրայելին և Պաղեստինի ինքնավարությանը վերաբերող մի շարք հարցերի:
Հարցման արդյունքում Նեթանյահուն հավաքել է միջինը 52.3 բալ, Օբաման` 51.5 բալ:
Բացի այդ, հարցվածների կեսից ավելին (60%) հավատում է, որ Նեթանյահուն ջանքեր է գործադրում Պաղեստինի հետ խաղաղության համաձայնագիր ձեռք բերելու ուղղությամբ: Հարցվածների 52%-ն էլ այն կարծիքին է, որ Պաղեստինի առաջնորդ Մահմուդ Աբասը ոչ մի ջանք չի գործադրում Իսրայելի հետ բանակցություններ սկսելու ուղղությամբ:
Հարցումը ցույց է տվել, որ Իսրայելի ժողովրդականությունը բարձրացել է ամերիկացիների շրջանում և գտնվում է 2007 թ.-ից հետո ամենաբարձր մակարդակի վրա:
Հիշեցնենք, որ օրերս լրագրողներին հաջողվել էր որսալ ԱՄՆ և Ֆրանսիայի նախագահների մասնավոր խոսակցությունը, որի ժամանակ Բարաք Օբաման ասել էր, որ «հոգնել է Նեթանյահուից, սակայն ստիպված է նրա հետ գործ ունենալ ամեն օր»:
