«Գագիկ Բեգլարյանը պաշտոնանկ արվեց, քանի որ ծեծել էր նախագահի աշխատակազմի ներկայացուցչին, սակայն նա ոչ միայն պիտի պաշտոնանկ արվեր, այլև նրա նկատմամբ պետք է քրեական գործ հարուցվեր, և նա պետք է քրեական պատասխանատվության ենթարկվեր»,- կարծիք հայտնեց իրավապաշտպան Էդմոն Մարուքյանը:
Նրա գնահատմամբ, երբ քաղաքացին պարզապես հրում է ոստիկանին, նրա նկատմամբ շատ խիստ քրեական գործ են հարուցում, իսկ երբ ոստիկանը կամ պաշտոնյան է դաժանաբար ծեծի ենթարկում քաղաքացուն, բոլորը բավարարվում են հասարակ ծառայողական հետաքննությամբ:
Իսկ Հելսինկյան քաղաքացիական ասոցիացիայի Վանաձորի գրասենյակի նախագահ Արթուր Սաքունց էլ ասաց. «Չոռնիին հեռացրին ոչ թե որովհետև մարդ էր ծեծել, այլ որ անմիջականորեն ձեռք էր բարձրացրել նախագահականի վրա: Իսկ, օրինակ, Մանվել Գրիգորյանի որդին` Էջմիածնի քաղաքապետ Կարեն Գրիգորյանը, ծեծել է ԴԱՀԿ-ի աշխատակցին, սակայն նրան պաշտոնանկ չեն արել»:
Սաքունցը ընդգծեց, որ Օսիպովը, Բազազը ամեն օր մարդ են ծեծում, սակայն նրանց դեմ քրեական գործ չի հարուցվում և պաշտոնից էլ չեն ազատվում. «2008 թ. մարտի1-ի 10 զոհերի սպանողներին բոլորս էլ գիտենք, սակայն երկու տարի է անցել, և ոչ ոք դրա համար պատասխանատվության չի ենթարկվել»:
