Հոտեմբերի 28-ին ՀԱԿ-ի հանրահավաքից առաջ Զովունի գյուղի իր բնակարանից նախկին քաղբանտարկյալ Ֆելիքս Գևորգյանին ոստիկանության Մաշտոցի բաժնի պետ Արթուր Գևորգյանը, տեղակալ Արկադի Սահակյանը և ևս հինգ աշխատակիցներ ծեծով ու խոշտանգումներով բաժին են տեղափոխել, առգրավել են տան բանալին, նրա անձնագիրը, մինչև հիմա անգամ պարզ չէ՝ ունեցե՞լ են արդյոք դրա համար օրինական հիմք, թե ոչ: Այս մասին մեզ հետ զրույցում տեղեկացրեց Ֆելիքս Գևորգյանի հայրը՝ Պետրոս Գևորգյանը: Վերջինս Աջափնյակի ՀԱԿ նախընտրական շտաբի ղեկավարն է:
Նա պատմեց նաև, որ անձնագիրը վերցրել են պահարանի միջից՝ այնտեղ եղած հագուստը թափելով, տան բանալին ևս վերցրել են և դռները բաց թողած հեռացել են: Հոկտեմբերի 19-ին նոր միայն բանալիները փաստաբանի միջոցով փոխանցել են հարազատներին: Տանը Ֆելիքսը մենակ է եղել, իսկ դրա առաջին օրը նրա ծննդյան օրն է եղել:
Նախկին քաղբանտարկյալի փաստաբանը՝ Ստեփան Ոսկանյանը, պատմեց, որ Ֆելիքս Գևորգյանին խոշտանգել են ոչ միայն բերման ենթարկելիս, այլև բաժնում, և ստիպել են, որ իր վրա վերցնի Մարտի 1-ի սպանություններից որևէ մեկը, սակայն երբ Ֆելիքս Գևորգյանը հրաժարվել է՝ նշելով, որ այդ գործով քաբանտարկյալ է եղել, նրան ստիպել են իր վրա վերցնել մի շարք գողությունների կատարումը, խոշտանգումներից հետո նա ընդունել է: Ֆելիքսի ոտքերն այրել են շիկացած երկաթով, նրա ոտքի մի եղունգը չկա, նա նույնիսկ չի կարողանում քայլել:
Նման մանրամասներ փոխանցեց Ստեփան Ոսկանյանը, որը անձամբ է տեսել խոշտանգումների հետքերը: Երեք օր առաջ փորձագետը եղել է մեկուսարանում, մի քանի օրից կստանան փորձաքննության պատասխանները: Փաստաբանն անհիմն է համարում այն մեղադրանքները, որոնք ընդունել է Գևորգյանը՝ ֆիզիկական և հոգեբանական ճնշումների ազդեցությամբ: Ավելին, ըստ նրա՝ ո՛չ կոնկրետ օրեր են նշված, ո՛չ էլ գողությունների կոնկրետ վայրեր կան. «Շինծու մեղադրանքով իբր Ֆելիքսը ինչ-որ շենքի հարևանությամբ գտնվող այգուց էլեկտրական շարժիչ է գողացել, Երևանի ինչ-որ խանութի հարևանությամբ գտնվող շինությունից, բայց կոնկրետ շինությունը չի նշվում, ինչ-որ նկուղից, տասնհինգ թաղամասի ինչ-որ կատյոլից»:
Հարկ է նկատել, որ պաշտպանի ներգրավումից հետո Ֆելիքսը հրաժարվել է իր ցուցմունքներից: Ամեն դեպքում Ֆելիքս Գևորգյանի հորից հետաքրքրվեցինք, թե ինչու է որպես թիրախ ընտրվել Ֆելիքս Գևորգյանը, ինչին ի պատասխան արձագանքեց. «Չեմ կարող հստակ այդ հարցին պատասխանել, բայց կարծում եմ, որ դա իմ գործունեության հետ է կապված: Դրանով չեն կարող խոչընդոտել իմ գործունեությունը, բայց համենայնդեպս փորձեցին: Տեսեք, ասում են՝ հուլիսի կեսերին գողություն է կատարվել, բայց ոչ մի օր չեն նշել: Դուք լսե՞լ եք նման բան, որ ո՛չ օր կա, ո՛չ ժամ, ո՛չ պատարագ, ո՛չ տեղ, բայց կա գողություն: Ավելին՝ նշված վայրը աղբանոց է: Տեսեք, հուլիսի 29-ին Ֆելիքսի մեծ աղջկա ծննդյան օրն էր, ինքը 4 երեխա ունի: Նա այդ ժամանակ ցանկանում էր աշխատանք գտնել, որ կարողանա երեխայի ծնունդը ըստ պատշաճի նշել, ու գտավ»,- մանրամասնեց Ֆելիքսի հայրը:
Պետրոս Գևորգյանը նաև պատմեց, որ շուրջօրյա վրանային հավաքի ժամանակ ևս ցանկացել են իրենց սադրել, որը սակայն հնարավոր է եղել կանխել և մանրամասնեց. «Նրանց նկարները կան մեզ մոտ նկարած, որ ցանկանում էին անպայման ինչ-որ բան դնել մեր վրանում: Նրանք նաև մեր բակային հանդիպումների ժամանակ են փորձել խանգարել, սադրանքներ հրահրել: Տղաներ են բերել, որ խուլիգանություն անեն, սակայն մենք միշտ փորձել ենք զերծ մնալ նրանց սադրանքերից»: Սակայն արդյունքում նման սցենար է մշակվել:
Հիշեցնենք, որ 2010 թ.-ի դեկտեմբերի 9-ին «Էրեբունի» ՔԿՀ-ից պայմանական-վաղաժամկետ ազատ է արձակվել քաղբանտարկյալ Ֆելիքս Գևորգյանը: Նա ազատազրկվել էր 2008-ի հունիսին և ապօրինի զենք հափշտակելու ու պահելու մեղադրանքով դատապարտվել 7 տարվա ազատազրկման: Գևորգյանի միջոցով իշխանությունը փորձել էր մարտի 1-ի գործերում ներառել ընդդիմության կողմից զենք պահելու հանգամանքը, սակայն դատարանում որևէ կերպ չհաջողվեց մեղադրանքն ապացուցել:
