Այսօր Ռուսաստանի արտաքին գործերի նախարար Սերգեյ Լավրովը բացատրություններ է պահանջել ՆԱՏՕ-ից` WikiLeaks-ի «բալթյան» փաստաթղթերի վերաբերյալ: Նա ասել է, որ ՆԱՏՕ-ի ծրագրերը` Մերձբալթիկան ռուսական ագրեսիայից պաշտպանելու համար, լուրջ հարցեր են առաջացրել ՌԴ արտգործնախարարությունում: Լավրովին առաջինը մտահոգել է այն փաստը, որ ըստ փաստաթղթի` ՆԱՏՕ-ն այդ ծրագիրը սկսել է մշակել անցած տարի դեկտեմբերից, երբ երկարատև ընդմիջումից հետո հանդիպում է եղել Ռուսաստանի և ՆԱՏՕ-ի միջև (արտգործնախարարների մակարդակով):
Երկրորդը, որ մտահոգություն է առաջացրել Ռուսաստանում, այդ ծրագիրը հաստատվել է Ռուսաստան-ՆԱՏՕ հանդիպման ժամանակ, երբ Ռուսաստանի նախագահ Դմիտրի Մեդվեդևի մասնակցությամբ հաստատվել էին փաստաթղթեր, որտեղ նշվում էր, որ կողմերը մեկը մյուսի կողմից վտանգ չեն տեսնում:
Լավրովն ասել է, թե այստեղից հարց է ծագում` ՆԱՏՕ-ի ղեկավարները ե՞րբ են անկեղծ եղել. «Երբ մեզ հետ պայմանավորվում էին համագործակցության վերաբերյալ, թե՞ այն ժամանակ, երբ քննարկում էին Ռւոսաստանից պաշտպանվելու հարցը: Մենք այս հարցերը տվել ենք և սպասում ենք դրանց պատասխաններին»,- ավարտել է իր խոսքը Լավրովը:
Vesti.ru-ն անմիջապես տեղադրեց ՆԱՏՕ-ի գլխավոր քարտուղար Ռասմուսենի պատասխանը, ըստ որի` Ռուսաստանը չի համարվում վտանգ ՆԱՏՕ-ի համար: «Թույլ տվեք ինձ նշել, որ համաձայն ՆԱՏՕ-ի քաղաքականության` մենք չենք քննարկում գաղտնի տեղեկությունների արտահոսքը»` դրանով խուսափելով հաստատելուց կամ հերքելուց այդ տեղեկությունների իրականությունը: «Ես ցանկանում են վստահ ասել, Ռուսաստանը չի հանդիսանում վտանգ ՆԱՏՕ-ի համար, իսկ ՆԱՏՕ-ն վտանգ չէ Ռուսաստանին»,- նշել է Ռասմուսենը` պատասխանելով ИТАР-ТАСС-ի հարցին: «Ընդհակառակը` մենք ցանկանում ենք զարգացնել իրական ռազմավարական համագործակցություն Ռուսաստանի և ՆԱՏՕ-ի միջև: Դա հենց այն է, ինչ մենք գրել ենք մեր նոր ռազմավարական հայեցակարգում»: