Այսօր ավարտվեց ԱՊՀ անդամ պետությունների Երկաթուղային տրանսպորտի խորհրդի 55-րդ երկօրյա նիստը, որի ավարտին ստորագրվեց եզրափակիչ արձանագրությունը: «Ռուսական երկաթուղիներ» ԲԲԸ նախագահ Վլադիմիր Յակունինը լրագրողներին տեղեկացրեց, որ իրենց հաջողվել է մինչև արձանագրության ստորագրումը համաձայնեցնել բոլոր հարցերը:
Վ.Յակունինը կարևորեց ԱՊՀ, Ֆինլանդիայի, Բալթյան երկրների տարածքում միասնական սակագնային քաղաքականությունը: Նիստի ընթացքում հաստատվել են սակագնային քաղաքականության չափանիշները: Նա կարևորեց նաև մաքսային և սահմանային անցակետերում գործընթացները ոչ միայն ուղևորափոխադրումների, այլև բեռնափոխադրումների դեպքում. «Այդ ուղղությամբ ջանքեր կգործադրվեն»:
«Հարավկովկասյան երկաթուղի» ՓԲԸ գլխավոր տնօրեն Շևկետ Շայդուլինը նշեց, որ կոնցենսիոն պայմանագիրն իրականացվում է ըստ նախատեսվածի: 2011 թ.-ին ներդրումները կկազմեն 16 մլրդ դրամ, ինչի 80%-ը հիմնականում կուղղվի ենթակառուցվածքների բարելավմանը, 2012-ին՝ 13.5 մլրդ դրամ:
Հաջորդ նիստը տեղի կունենա մայիսին և լինելու է հոբելյանական՝ նշվելու է խորհրդի 20-ամյակը և ՌԴ երկաթուղիների 175-ամյակը:
Նշենք, որ խորհրդի անդամներն են՝ Հայաստանը, Ադրբեջանը, Բելառուսը, Ղազախստանը, Ղրղզստանը, Տաջիկստանը, Թուրքմենստանը, Ուզբեկստանը, Մոլդովան, Ռուսաստանը, Ուկրաինան: Ասոցացված անդամներն են՝ Բուլղարիան, Վրաստանը, Լատվիան և Ֆինլանդիան, իսկ պայմանագրային հիմունքներով Խորհրդի աշխատանքներին մասնակցում են նաև Լիտվան և Էստոնիան: Խորհրդում դիտորդի կարգավիճակ ունի Երկաթուղու աշխատողների և տրանսպորտային շինարարների արհմիության միջազգային կոնֆեդերացիան:
