Գյուլն ու Էրդողանը հետաձգել են իրենց այցերն աղետի գոտի

Թուրքական Cumhuriyet թերթի փոխանցմամբ՝ նախ Թուրքիայի նախագահ Աբդուլլահ Գյուլը, ապա վարչապետ Էրդողանը հետաձգեցին իրենց այցերը դեպի աղետի գոտի՝ Վանի նահանգ, ուր կիրակի օրը տեղի է ունեցել ավերիչ երկրաշարժ։

Գյուլի այցը պետք է տեղի ունենար այսօր, իսկ Էրդողանի այցը՝ շաբաթվա վերջին։ Սակայն այս երկու այցերն էլ հետաձգվել են, և այդ կապակցությամբ որևէ պարզաբանում չի տրվել։

Հիշեցնենք, որ օրեր առաջ Գյուլը հայտարարել էր, թե ցանկանություն է ունեցել աղետի գոտի այցելել երկրաշարժի հենց առաջին օրը, սակայն այդ քայլին չի գնացել, քանի որ կարծել է, թե իր ներկայությունը կխանգարի այնտեղ աշխատող փրկարարներին՝ շեղելով նրանց ուշադրությունը։