Երգչուհի Սոնա Շահգելդյանն այսօր լրագրողների հետ հանդիպմանն անդրադարձավ առհասարակ մրցանակաբաշխություններին, մրցույթներին. «Ես չեմ մասնակցում մրցույթներին ուղղակի մասնակցություն ունենալու համար, 12 տարեկանից մասնակցել եմ մրցույթներին, շատ մրցանակներ ունեմ, այդ թվում` Գրան պրիներ, իմ ամենամեծ մրցանակը «Նոր ալիք» մրցույթի առաջին մրցանակն էր, ինձ համար դրանից ավելի մեծ երջանկություն չկար»,- նշեց Շոնա Շահգելդյանը՝ ավելացնելով․ «Նոր ալիք» մրցույթն արդեն տասնմեկ տարի կա՝ ի տարբերություն «Եվրատեսիլի», «Նոր ալիքում» արժանին է հաղթում, չափանիշներն էլ լավ ձայնն ու բեմական կուլտուրան են»:
Երգչուհին «Եվրատեսիլ» մրցանակաբաշխությանը «թերթև» է նայում, խոստովանեց, որ կցանկանար մասնակցել «Եվրատեսիլին», սակայն առաջարկներ դեռ չեն եկել: Նա նաև ասաց, որ չի մասնակցի զուտ մասնակցության համար, այն դեպքում, երբ գիտի` ում են ընտրելու. «Մեր հայերը դրան մի քիչ ավելի շատ են տեղ տալիս, իրենց համար սա կյանքի իմաստ է, ինձ համար կյանքի իմաստ չէ, ես ավելի մեծ մրցույթների եմ ուզում մասնակցել»,-ասաց երգչուհին` ավելացնելով, որ ինքն ազատ և ճիշտ է սիրում խոսել, իսկ եթե իմանա` ինքը պետք է ներկայացնի Հայաստանը «Եվրատեսիլին», կպատրաստվի շատ լուրջ: Իսկ Հայասատանի` «Եվրատեսիլում» հաղթելը դեռ շուտ է համարում:
Իսկ հարցին` Ադրբեջանում կհամաձայնե՞ր մասնակցել, պատասխանեց, որ, իհարկե, մենք պետք է հայ մնանք, բայց սա չի նշանակում, որ չպետք է մասնակցենք, սա Եվրոպան է որոշում, պետք է մասնակցենք, պարծենանք մեր դրոշով, երգով և այլն: Նա նշեց, որ «Եվրատեսիլի» համար պետք է համախմբված աշխատեն, աշխատակազմից սկսած՝ պետք է շատ լուրջ պատրաստվեն: «Կան երգեր, որոնք ընդհանրապես չեն հաղթել, բայց դա նրանց համար տրագեդիա չի»,-ասաց Սոնա Շահգելդյանը` ավելացնելով, որ «Եվրատեսիլում» նայում են շոուին և քաղաքականությանը:
Նոյեմբերի 13-ին Սոնա Շահգելդյանի առաջին մենահամերգն է: Ինչպես նշեց երգչուհին, կլինեն լավ երգեր` տարբեր ժանրատեսակներով: Համերգին լինելու է Ռուբեն Հախվերդյանը: «Այդ տեսակ մարդկանց պետք է պահեն, փայփայեն, և լավին դրսերում չփորձեն գտնել»,- ասաց երգչուհին:
