Արքայազն Հարրիին, որը հոկտեմբերի 7-ին իր ընկերների հետ զվարճացել է Կալիֆոռնիայի Սան Դիեգո քաղաքի Ivy ակումբում, տեղի պապարացիները բռնացրել են 26-ամյա Ջեսիկա Դոնալդսոնի հետ համբուրվելիս:
Ինչպես փոխանցում է NEWSru Israel-ը, ԶԼՄ-ները հավաստիացնում են, որ արքայազնը նրա հետ հյուրանոցում գիշեր է անցկացրել։
Մամուլը զարմանքով է արձանագրել մատուցողուհու և արքայազնի եղբոր կնոջ` Քեյթ Միդլտոնի արտաքինի զարմանալի նմանությունը: Աղջիկներին հնարավոր է տարբերել միայն մատուցողուհու փորի հսկայական ծաղկե դաջվածքով:
Ջեսիկան լրագրողների հետ զրույցում ասել է, որ Հարրին «իսկական անգլիացի ջենտլմեն է և հրապուրիչ արքայազն, բայց հերքել է իրենց սիրավեպի մասին լուրերը` դրանք որակելով «կատարյալ հորինվածք»:
Սակայն այն ժամանակ, երբ նրան հարցրել են` ինչու է այդ դեպքում համբուրվել արքայազնի հետ, աղջիկը փղձկացել է ու դուրս վազել սենյակից:
Ավելի ուշ նա հայտարարել է, որ «այդ ամբողջ պատմությունը» իրեն շատ է նյարդայնացնում:
The Daily Mail հրատարակությունը հաղորդում է, որ Ջեսիկա Դոնալդսոնը սպասարկում է ակումբի VIP հատվածը: Հայտնի հյուրերին նա հյուրասիրում է Belvedere և Absolut օղիներ, ինչպես նաև ալկոհոլային այլ խմիչքներ և ստանում է 500 դոլար ամեն սեղանից` որպես թեյավճար:
Ակումբում կազմակերպված երեկույթից հետո երիտասարդները հանդիպել են Pipes սրճարանում ու միասին նախաճաշել, ընդ որում, արքայազնը օմլետ է ճաշակել: Դրանից հետո նրանք գնացել են մեքսիկական ռեստորան, պատվիրել չիփսեր, սուր սոուս և մրգային կոկտեյլներ:
Հրատարակությունը պնդում է, որ արքայազն Հարրին գիշերն անցկացրել է Marriott Courtyard հյուրանոցի թագավորական համարում անծանոթ թխահերի հետ, որը շատ է հիշեցրել Ջեսիկա Դոնալդսոնին:
Ինքը` Ջեսիկան, որը շուրջ երեք տարի է` ապրում է իր ընկերոջ` 28-ամյա իմպրեսարիո Բրենդոն Թոմասի հետ, պնդում է, որ դա ինքը չի եղել, թեև հյուրանոցի աշխատակիցները նկարով ճանաչել են նրան:
Արքայազն Հարրին ԱՄՆ-ում է մարտական Apache ուղղաթիռների վարումը կատարելագործելու հմտությունները խորացնելու նպատակով: Ծրագիրը նախատեսված է երկու ամսվա համար: ԱՄՆ-ից հետո թագավորական ընտանիքի անդամը նորից ծառայության կմեկնի Աֆղանստան:
