Եթե Գասպարին արգելված արարք էր արել, նրան պետք էր տեղում ձերբակալել, եթե հետո է ձերբակալվում, այստեղ պարզ չէ` դա ձերբակալություն է, թե բերման ենթարկել: «Առաջին լրատվականի» հետ զրույցում ասաց փաստաբան Արա Ղազարյանը` խոսելով երեկ Վարդգես Գասպարիի բերման ենթարկման շուրջ:
«Եթե հրավիրում են նրան, նա հրաժարվում է, ուրեմն նրան կարող են բերման ենթարկել ձերբակալման ընթացակարգով, բերման ենթարկման ընթացակարգը հիմա հարցականի տակ է Եվրոպական դատարանի կողմից և նախատեսվում է այդ ինստիտուտը վերացնել: Օրենսդրությամբ ոչ բավարար հստակությամբ է կարգավորված այս ինստիտուտը, եթե Գասպարիին բերման են ենթարկել, հարկադրանք են կիրառել, ապա դա իրավաչափ չէ»,- մեկնաբանեց Ա.Ղազարյանը`հավելելով, որ եթե անհրաժեշտություն կար Գասպարիին ազատությունից զրկելու, ապա միայն ձերբակալման ընթացակարգով խախտման պահին:
Փաստաբանի հավաստիացմամբ` այս դեպքում երկու տարբեր ընթացակարգեր խառնվում են իրար, կոնկրետ պարզ չէ` որ ընթացակարգով են տարել ոստիկանություն, հետևաբար իրավաչափ չէ ոստիկանության գործողությունը: «Մարդիկ իրավունք ունեն իրենց բողոքի միջոցառումն անել ամեն վայրում, որն արգելված չէ, իսկ կառավարության շենքի բակն արգելված գոտի չէ: Գասպարին իրավունք ուներ այնտեղ շարունակել իր բողոքի ակցիան, չեմ հասկանում ոստիկանապետն ինչու չի շրջանցել: Գասպարին այդտեղ կոնկրետ նպատակ ուներ. պիկետ էր անում: Եթե դա բողոքի ակցիա է, ապա պետք է հնարավորություն տրվի ակցիան կատարելու, այստեղ գերակայում է քաղաքացու տվյալ պահին քաղաքի բանուկ միջավայրում բողոքի ակցիա անելը, քան ոստիկանապետի տվյալ վայրով անցնելը»,- կարծիք հայտնեց Ա. Ղազարյանը:
Նա նաև նշեց, որ քաղաքացին պետք է հաշվի առներ, որ ոստիկանապետը նույնպես քաղաքացի է:
«Ոստիկանապետը քաղաքացի է և պետք չէր վանկարկել նրա հասցեին, սակայն դա չի նշանակում, որ պետք է նրան բերման ենթարկեին ոստիկանություն»,- ամփոփեց փաստաբանը:
Տեղեկացնենք, որ երեկ առավոտյան «Բանակն իրականում» խաղաղ ակցիան իրականացնելիս բռնի ուժի գործադրմամբ ոստիկանություն բերման ենթարկվեց խաղաղ ցուցարար Վարդգես Գասպարին:
