Ադրբեջանական Turan լրատվական գործակալության փոխանցմամբ՝ ամերիկացի պաշտոնատար անձինք և վերլուծաբանները թերահավատորեն են մոտենում ՄԱԿ ԱԽ ժամանակավոր անդամ դառնալու Ադրբեջանի հնարավորություններին։
Անհայտ մնալ ցանկացող ամերիկյան պաշտոնական աղբյուրը նշել է. «Մենք կարծում ենք, որ Ադրբեջանի աշխարհաքաղաքական դիրքը և էներգետիկ անվտանգության համակարգում նրա դերակատարությունը մեծ դեր են խաղում, սակայն Ադրբեջանի շանսերի վրա ստվեր են գցում մարդու իրավունքների խախտումներն ու ոչ ժողովրդավարական պրակտիկան»։
Վաղը ՄԱԿ-ն ընտրելու է Անվտանգության խորհրդի 5 ժամանակավոր անդամներին։ Դրա հետ կապված՝ թեկածու երկրներն ակտիվացնում են իրենց գործունեությունը՝ ընտրվելու համար։ Ընտրվելու դեպքում նրանք ԱԽ-ում կներառվեն 2012 թվականի հունվարի 1-ից՝ մինչև 2013 թվականի վերջը։
Նրանք ՄԱԿ ԱԽ-ում կփոխարինեն Լիբանանին, Բոսնիա-Հերցեգովինային, Բրազիլիային, Գաբոնին և Նիգերիային, որոնց գործունեության ժամկետը սպառվում է այս տարվա դեկտեմբերի 31-ին։
Միջազգային հարաբերությունների ամերիկացի պրոֆեսոր Ջոշուա Գոլդշտեյնը կարծում է, որ Ադրբեջանի մրցակիցները լինելու են Սլովենիան և Հունգարիան։ Նրա կարծիքով՝ այն, որ Ադրբեջանը ԵՄ-ին անդամակցելու թեկնածու և Արևելյան Եվրոպայի երկրների մրցակից է, նվազեցնում է նրա շանսերը։
Նրա հետ համակարծիք է Century հիմնադրամը ներկայացնող Ջեֆֆ Լորենտին, ում կարծիքով՝ ավելի գերադասելի են Արևելյան Եվրոպայի երկրների հնարավորությունները. «Հունգարիայի ու Սլովենիայի շանսերը գնահատվում են 78 տոկոս, մինչդեռ Ադրբեջանի պարագայում այդ ցուցանիշը կազմում է ընդամենը 25 տոկոս»։
Հիշեցնենք, որ Ադրբեջանը ՄԱԿ ԱԽ ժամանակավոր անդամ դառնալու հայտ ներկայացրել է նաև 1990-ական թվականների կեսերին, սակայն ձախողվել է։ Այժմ նրա հույսը մուսուլմանական և թյուրքալեզու երկրներն են, ինչպես նաև Չմիավորման շարժման անդամ երկրները։ Ռուսաստանը ևս կողմ է դրան, մի շարք լատինական երկրներ՝ նույնպես։
ՄԱԿ-ի ԱԽ-ը բաղկացած է 15 անդամներից, որոնցից 5-ը (ԱՄՆ, Ռուսաստան, Չինաստան, Մեծ Բրիտանիա, Ֆրանսիա) մշտական անդամներ են, իսկ 10-ը՝ ժամանակավոր անդամներ։
