«Մշակույթ» համահայկական հիմնադրամի գործադիր տնօրեն Աբգար Ափինյանը, «Առաջին լրատվականի» հետ զրույցում անդրադարձ կատարելով վերջին շրջանում բանակում տեղ գտած արատավոր երևույթներին, ասաց, որ պատճառն այն է, որ մենք ստեղծել ենք հիվանդ հասարակություն, որն իր 18 տարեկան պատանիներին ուղարկում է բանակ և այդ հիվանդություններն ավելի սուր դրսևորում են ստանում` անհանդուրժողականություն, արհամարհանք միմյանց նկատմամբ, թշնամական հարաբերություններ:
«Մեր հասարակության մեջ դրանք բոլորը կան, միմյանց չհարգելու այն տհաճ մթնոլորտը պատանիների միջոցով տեղափոխվում է բանակ ու վերածվում մարդասպանության: Բանակ է գնում մեր հասարակության խոցը, մեր հիվանդությունը, հարգանքի բացակայությունը»,- ընդգծեց նա` նշելով, որ շատ լավ գիտի, թե մեզանում ինչպես է ձևավորվել այդ մթնոլորտը:
Նրա խոսքով` պատճառը ամենաթողությունն է, երբ ոտնահարվում են բոլոր ազգային արժեքները, և եթե մենք ուզում ենք բանակում ինչ-որ մի բան փոխել, աչքներս չորս արած պետք է նայենք մեր հասարակությանը:
«Մեր հասարակությունն այսօր կատարելապես հիվանդ հասարակություն է, որը չունի իր արժեքային համակարգը, չափորոշիչները, որը ոտնատակ է տալիս այն սրբությունները, որոնք մեզ հայ են պահել»,- ընդգծեց նա:
