Երրորդ եռամսյակում ՀՀ առևտրային բանկերի մեծ մասն ակնկալում է դրամային և արտարժութային վարկերի, ինչպես նաև ավանդների տոկոսադրույքների անփոփոխ մակարդակ:
Այս դեպքում վարկային պարտավորությունների սպասարկման բեռի էական փոփոխություններ չեն սպասվում: Ինչպես նշվում է Կենտրոնական բանկի այսօր հրապարակած «Ֆինանսական կայունության հաշվետվություն»-ում, 2011 թ. առաջին կիսամյակում վարկավորման համեմատ առավել բարձր աճ է արձանագրվել ֆիզիկական անձանց ավանդների, մասնավորապես` ժամկետային ավանդների մասով` 15.5%: Ժամկետային ավանդներում շարունակել են գերակշռող մնալ արտարժութային ավանդները, որոնց մասնաբաժինը տարեվերջի համեմատ նվազել է 1.6 տոկոսային կետով և կազմել 79.2%: Այլ արժույթների նկատմամբ դրամի արժևորման պարագայում տնային տնտեսությունները ենթակա են արտարժութային ռիսկի:
2011 թ. առաջին կիսամյակում առևտրային բանկերի և վարկային կազմակերպությունների կողմից տրամադրվել է 22.3 մլրդ դրամի 2072 վարկ: Դիտարկվող ժամանակահատվածում Ազգային հիփոթեքային ընկերության կողմից վերաֆինանսավորվել է 405 հիփոթեքային վարկ՝ 3.1 մլրդ դրամ ծավալով, որը նախորդ տարվա առաջին և երկրորդ կիսամյակների համեմատ նվազել է՝ համապատասխանաբար 19.0% և 11.7%-ով: Ընդ որում` վերաֆինանսավորված վարկերի 71.2%-ը բաժին է ընկել Երևանին:
Վերոնշյալ ժամանակահատվածում «Երիտասարդ ընտանիքին` մատչելի բնակարան» ծրագրի շրջանակներում վերաֆինանսավորվել է 280 վարկ՝ 2 մլրդ դրամ գումարով, որից 236-ը՝ 1.2 մլրդ դրամ գումարով, տրամադրվել է Երևանում: 2010 թ. վերջին մարզերի բնակիչների համար ծրագրի պայմանների դյուրինացումը որոշակիորեն նպաստել է մարզերում վարկավորման աշխուժացմանը, որի տեսակարար կշիռը տարեվերջի համեմատ ավելացել է 7.7 տոկոսային կետով և կազմել 40.0%:
2011 թ. առաջին կիսամյակում տնտեսությանը տրամադրված վարկերն ավելացել են 18.0%-ով, ինչը 2.3 անգամ բարձր է 2010 թ. նույն ժամանակաշրջանի 7.9% աճից: Չնայած բանկերը որոշակիորեն մեղմացրել են վարկառուների ընտրության ընթացակարգերը, այնուամենայնիվ, դրանք դեռևս համարվում են բավականին խիստ:
Հաշվետու կիսամյակում չաշխատող վարկերի (հսկող, ոչ ստանդարտ և կասկածելի ռիսկային դաս ունեցող վարկեր) տեսակարար կշիռը ընդհանուր վարկային պորտֆելում տարեսկզբի համեմատ աճել է 0.3 տոկոսային կետով և կազմել 3.4% (30.06.2010 թ. դրությամբ` 4.8%): Վարկային ներդրումների ճյուղային բաշխվածության տեսանկյունից՝ չաշխատող ակտիվների տեսակարար կշիռը համեմատաբար բարձր է հիփոթեքային, շինարարության և հանրային սննդի ու սպասարկման այլ ոլորտի վարկերում` համապատասխանաբար 5.9%, 4.4% և 4.1%:
