Թուրքական Anadolu գործակալության փոխանցմամբ՝ եվրոպական հարցերով պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշն ընդունել է Թուրքիայում գտնվող ԱՄՆ Կոնգրեսի Ներկայացուցիչների պալատի անդամներին։
Հանդիպման ժամանակ Բաղըշն ընդգծել է թուրք-ամերիկյան հարաբերությունների կարևորությունը։ Նա նաև կարևորել է այն, որ ժողովրդավարության, մարդու իրավունքների, խոսքի ազատության և այլ ոլորտներում երկու երկրների հայացքները համընկնում են։ Բաղըշը հավելել է, որ տնտեսական ոլորտում համագործակցությունը պետք է անցում կատարի նոր մակարդակի։
Բաղըշը հիշեցրել է, որ ԱՄՆ-ը աջակցում է ԵՄ-ին Թուրքիայի անդամակցության գործընթացին։ Նա ԱՄՆ-ին կոչ է արել համոզել ԵՄ-ին՝ կիպրական հարցի չլուծված լինելու պատճառով Թուրքիայի անդամակցության գործընթացը չխոչընդոտելու համար։
Հիշեցնենք, որ ԱՄՆ-ը համառորեն ձգտում է 74 միլիոն մուսուլմանական բնակչությամբ Թուրքիան ներառել քրիստոնեական ԵՄ-ում` դրանով իսկ խաթարելով նրա միասնականությունը և թուլացնելով մրցունակությունը:
Փաստորեն, ամերիկյան հաշվարկներով, ԵՄ-ում Թուրքիային հատկացված է «տրոյական ձիու» դեր: Բացի այդ, ԱՄՆ-ը դրանում է տեսնում Թուրքիայի իսլամականացման կանխման միակ ուղին` համոզված, որ հակառակ դեպքում Թուրքիան կարող է դառնալ անկանխատեսելի և սպառնալիք ներկայացնել ամերիկյան շահերին:
Դրա համար էլ ԱՄՆ-ը Թուրքիային արգելում է ծավալվել դեպի արևելք և ուղղում է նրան դեպի արևմուտք, ինչին էլ դեմ է հանդես գալիս ԵՄ-ը: Ստացվում է, որ Թուրքիան հայտնվել է երկու քարի` Արևմուտքի ու Արևելքի արանքում և շարունակում է դոփել նույն տեղում:
