«Նաիրիտում» 4 ամսվա աշխատավարձի պարտք է կուտակված: Գործարանի լրատվական ծառայության ղեկավար Անուշ Հարությունյանը «Առաջին լրատվականին» հայտնեց, որ այս պահին ոչ մի նոր բան չկա. «Որևէ ինֆորմացիա հաղորդել չեմ կարող, թե ինչ է արվում աշխատավարձերի խնդիրը լուծելու համար»:
Ա.Հարությունյանը նշեց, որ ամբողջ աշխատակազմը աշխատավարձ չի ստացել, բայց թե որքան գումար է կազմում պարտքը՝ չմանրամասնեց:
«Նաիրիտի» գիտական կենտրոնի կաուչուկի տեխնոլոգիայի լաբորատորիայի նախկին վարիչ, քիմիկոս Ջիլբերտ Մուրադյանը մեզ հետ զրույցում նշեց, որ գործարանի աշխատակազմը «մարտական վիճակում» է. «Աշխատավարձ տալիս են՝ սուս են անում, գումարը վերջանում է՝ բողոքում են: Հենց մի բան եղավ՝ ոտքի կկանգնեն»:
Հիշեցնենք, որ «Նաիրիտի» կառավարման օպերատորի դերը ստանձնելու հայտ էր ներկայացրել լեհական «Սավեքս» ընկերությունը, սակայն բանակցությունները դրական արդյունք չունեցան: Այսօր լեհական կողմը կրկին ակտիվություն է ցուցաբերել. ՀՀ-ում Լեհաստանի դեսպան Զդիսլավ Ռաչինսկին հայտարարել է, թե լեհական բոլոր այն ընկերությունները, որոնք մինչ օրս համագործակցել են «Նաիրիտի» հետ, շարունակում են հետաքրքրություն ցուցաբերել և վերլուծական աշխատանքներ են իրականացնում` հետագայում ներդրումներ կատարելու համար: Միաժամանակ, դեսպանը որևէ ժամկետ չի նշել՝ ասելով, թե արդյունքների մասին կարելի կլինի խոսել 1 տարվա ընթացքում:
