Независимая газета-ի փոխանցմամբ՝ Հայաստանի և Ադրբեջանի նախագահների հերթական հանդիպումը կարող է տեղի ունենալ Ֆրանսիայի նախագահ Նիկոլա Սարկոզիի միջնորդությամբ։ Այս մասին երեկ հայտնել են ադրբեջանական աղբյուրները՝ ընդգծելով, որ այդպիսի առաջարկ արվել է ոչ վաղ անցյալում Սարկոզիի կատարած տարածաշրջանային այցի ժամանակ։
Նշվում է, որ դա քննարկվել ու հավանության է արժանացել ԱՄՆ-ի ու Ռուսաստանի կողմից։ Սակայն Հայաստանի ԱԳՆ-ի պաշտոնական ներկայացուցիչը կտրուկ հերքել է այդ տեղեկատվությունը։ Նա նշել է, որ վերջին շրջանում Ադրբեջանի մոտ նկատվում են տարօրինակություններ։
Հայ դիվանագետը դրանցից մեկի ներքո նկատի ունի հայ-ադրբեջանական շփման գծում ադրբեջանական կողմի նախաձեռնած մոտ 3 կիլոմետրանոց պատի կառուցումը, որն ուղղված է «հայկական փամփուշտներից ադրբեջանական գյուղերի պաշտպանությանը»։
Լեռնային Ղարաբաղի պաշտպանության բանակի ներկայացուցիչն իր հերթին այս կապակցությամբ նշել է. «Հայկական կողմը հայտարարել է, որ պատրաստ է ամեն տիպի օգնություն ցուցաբերել այդ պատի կառուցման հարցում։ Եվ խոսքը ոչ միայն 3 կիլոմետրանոց հատվածի, այլև ողջ սահմանի երկայնքի մասին է, որպեսզի ո՛չ նրանք մեզ տեսնեն, ո՛չ էլ մենք նրանց։
Ադրբեջանի համար ավելի էժան կլիներ իր դիպուկահարներին շփման գծից հեռացնելը, ինչը նրանք չեն անում՝ չնայած ԵԱՀԿ Մինսկի խմբի հորդորներին։ Մենք էլ ստիպված ենք լինում կրակոցին պատասխանել կրակոցով։ Մի խոսքով՝ նրանք նավթադոլարներ շատ ունեն, ցանկանում են պատ կառուցել, թո՛ղ այդպես էլ լինի»։
