Լիոնել Մեսսին շարունակում է վերաշարադրել ֆուտբոլի պատմությունը։ Արգենտինայի հավաքականի հարձակվողը 2026 թվականի աշխարհի առաջնության խմբային փուլի՝ Ալժիրի դեմ խաղում (3:0) միանգամից մի քանի ռեկորդ է սահմանել։ 38-ամյա ֆուտբոլիստը դարձել է աշխարհի առաջնությունների պատմության մեջ ամենաշատ հանդիպումներում ավագի թևկապով հանդես եկած խաղացողը՝ իր ակտիվում ունենալով 20 հանդիպում։ Այս ցուցանիշով նա շրջանցել է Ռաֆայել Մարկեսին (17 խաղ) և Դիեգո Մարադոնային (16 խաղ)։
Մեսսին Ալժիրի դեմ խաղում խփել է երեք գոլ՝ աչքի ընկնելով 17-րդ, 60-րդ և 76-րդ րոպեներին։ Նա կարող էր նաև պոկեր ձևակերպել, սակայն 5-րդ րոպեին խփած գոլը չեղարկվել է խաղից դուրս վիճակի պատճառով։ Այս հեթ-տրիկով արգենտինացին կրկնել է Միրոսլավ Կլոզեի ռեկորդը՝ աշխարհի առաջնություններում խփած գոլերի քանակը հասցնելով 16-ի։ Սա լավագույն ցուցանիշն է մրցաշարի պատմության մեջ։
Միևնույն ժամանակ Մեսսին դարձել է աշխարհի առաջնությունների պատմության ամենատարեց հեթ-տրիկի հեղինակը։ Նա գերազանցել է Կրիշտիանու Ռոնալդուի ռեկորդը, որը 33 տարեկանում երեք գոլ էր խփել Իսպանիայի դարպասը 2018 թվականի աշխարհի առաջնությունում։ Բացի այդ, Մեսսին դարձել է պատմության առաջին ֆուտբոլիստը, որը մասնակցել է աշխարհի առաջնությունների վեց եզրափակիչ փուլերի։ Ալժիրի դեմ հանդիպումը նրա համար դարձել է նաև աշխարհի առաջնություններում անցկացրած 27-րդ խաղը, ինչը ևս ռեկորդային ցուցանիշ է։
