ԵԱՀԿ-ում Հայաստանի մշտական ներկայացուցչությունը ԵԱՀԿ Մշտական խորհրդի 1568-րդ նիստում հայտարարությամբ է հանդես եկել հունիսի 7-ին Հայաստանում կայացած խորհրդարանական ընտրությունների վերաբերյալ։
Հայտարարությունը հրապարակել է Ավստրիայում Հայաստանի դեսպանությունը, որը ներկայացնում ենք ստորև՝ ամբողջությամբ.
«2026թ. հունիսի 7-ին Հայաստանի Հանրապետությունում տեղի ունեցան Ազգային ժողովի ընտրություններ, որոնք ժողովրդավարական գործընթացների և հասարակական մասնակցության կարևոր դրսևորում հանդիսացան և արտացոլեցին Հայաստանի շարունակական հանձնառությունը՝ անցկացնելու ազատ, արդար և թափանցիկ ընտրություններ՝ միջազգային պարտավորություններին և ԵԱՀԿ հանձնառություններին համապատասխան։
Երկրի ամբողջ տարածքում բացվել էին 2,005 ընտրատեղամասեր, այդ թվում՝ 9 ընտրատեղամասեր, որոնք գործում էին քրեակատարողական հիմնարկներում։ Առանձնահատուկ ուշադրություն էր հատկացվել ընտրական ենթակառուցվածքների և ընթացակարգերի մատչելիության ապահովմանը՝ նպաստելով ընտրելու իրավունք ունեցող բոլոր քաղաքացիների մասնակցությանը։
Ընտրությունների անցկացմանը հետևում էին մեծ թվով տեղական և միջազգային դիտորդական առաքելություններ։ Կենտրոնական ընտրական հանձնաժողովը հավատարմագրել էր 13 տեղական դիտորդական կազմակերպությունների և ավելի քան 600 միջազգային դիտորդների 8 կազմակերպություններից, այդ թվում՝ ԵԱՀԿ/ԺՀՄԻԳ-ի, ԵԱՀԿ Խորհրդարանական վեհաժողովի, Եվրոպայի խորհրդի խորհրդարանական վեհաժողովի, Եվրոպական խորհրդարանի, ԱՊՀ-ի, ԱՊՀ Միջխորհրդարանական վեհաժողովի և Ֆրանկոֆոնիայի միջազգային կազմակերպության ներկայացուցիչների։ Բացի այդ, ընտրություններին դիտորդի և այցելուի կարգավիճակով հետևել են Հայաստանում հավատարմագրված 35 դիվանագիտական և հյուպատոսական ներկայացուցչությունների անդամներ, ինչպես նաև 14 օտարերկրյա ընտրական կառավարման մարմինների ներկայացուցիչներ։
Ընտրական գործընթացը նաև լայնորեն լուսաբանվել է լրատվամիջոցների կողմից։ Ընտրությունների լուսաբանման համար հավատարմագրվել էին 71 տեղական լրատվամիջոցներ և շուրջ 180 օտարերկրյա լրագրողներ ու լրատվամիջոցների ներկայացուցիչներ։
Ընտրություններին մասնակցելու իրավունք ունեցողների ցուցակում ընդգրկվել էր 2,505,228 քաղաքացի։ Ընտրություններին մասնակցել է ընդամենը 1,477,736 քաղաքացի, ինչը կազմում է ընտրողների 58.94 տոկոսը։
Կենտրոնական ընտրական հանձնաժողովի հրապարակած նախնական արդյունքների համաձայն՝ երեք քաղաքական ուժ հաղթահարել է ընտրական շեմը և ներկայացված կլինի Ազգային ժողովում։ Այդ ուժերն են՝ «Քաղաքացիական պայմանագիր» կուսակցությունը, «Ուժեղ Հայաստան» դաշինքը և «Հայաստան» դաշինքը։ «Քաղաքացիական պայմանագիր» կուսակցությունը ստացել է խորհրդարանական մեծամասնություն և կձևավորի Հայաստանի Հանրապետության հաջորդ կառավարությունը։
Ընտրությունների պաշտոնական արդյունքները, Ընտրական օրենսգրքին համապատասխան, վերջնականացվելու և պաշտոնապես հաստատվելու են Կենտրոնական ընտրական հանձնաժողովի կողմից 2026թ. հունիսի 14-ին։
Պարոն նախագահ,
ԵԱՀԿ/ԺՀՄԻԳ ընտրությունների դիտորդական առաքելության նախնական եզրակացություններում նշվել է, որ Հայաստանի ընտրողներին տրվել է և նրանք օգտվել են իրական ընտրություն կատարելու հնարավորությունից՝ պրոֆեսիոնալ կերպով կազմակերպված ընտրական գործընթացում՝ կենսունակ և բազմակարծիք քաղաքական միջավայրում։ Հայաստանը բարձր է գնահատում իր համագործակցությունը ԺՀՄԻԳ-ի և այլ միջազգային դիտորդական առաքելությունների հետ և բարեխղճորեն կդիտարկի բոլոր այն առաջարկությունները, որոնք ուղղված են ընտրական գործընթացների, ժողովրդավարական հաստատությունների և հանրային վստահության հետագա ամրապնդմանը։
Հարգելի գործընկերներ, այս ընտրությունների անցկացումը ևս մեկ անգամ ի ցույց դրեց ինչպես Հայաստանի ժողովրդավարական հաստատությունների դիմակայունությունը, այնպես էլ՝ այն մարտահրավերները, որոնց առավել հաճախ են սկսել բախվել ժողովրդավարությունները ԵԱՀԿ ամբողջ տարածքում։ Ինչպես ընդգծել է ԵԱՀԿ/ԺՀՄԻԳ ընտրությունների դիտորդական առաքելությունը, Հայաստանում ընտրությունն իրականացել են օտարերկրյա աննախադեպ միջամտության և ճնշումների պայմաններում։ Ընտրական ամբողջ ժամանակահատվածում ակտիվորեն կիրառվել են օտարերկրյա տեղեկատվական մանիպուլյացիաներ և միջամտություն (FIMI), ապատեղեկատվական արշավներ, կիբեռանվտանգությանն առնչվող սպառնալիքներ և այլ հիբրիդային գործողություններ՝ ուղղված հանրային կարծիքի վրա ազդեցության գործադրմանը, ժողովրդավարական հաստատությունների նկատմամբ վստահության խաթարմանը և հասարակության բևեռացմանը։ Հայաստանը բարձր է գնահատում համախոհ գործընկերների բազմակողմանի աջակցությունը, գերազանց համագործակցությունը և ցուցաբերած օժանդակությունը։
Կարևոր է նշել, որ նշված գործողությունները չեն դադարել քվեարկության ավարտից հետո։ Դրանք շարունակվում են հետընտրական շրջանում՝ նպատակ ունենալով կասկածի տակ դնել ընտրությունների արդյունքները, թուլացնել հանրային վստահությունը ժողովրդավարական հաստատությունների նկատմամբ և խորացնել հասարակության ներսում առկա բաժանարար գծերը։ Այս սպառնալիքներին դիմակայելու կարողությունների ամրապնդումը շարունակում է կարևոր խնդիր մնալ ԵԱՀԿ բոլոր մասնակից պետությունների համար։
Եզրափակելով՝ ցանկանում եմ վերահաստատել Հայաստանի հանձնառությունը՝ շարունակելու ամրապնդել իր ժողովրդավարական հաստատությունները, ապահովել օրենքի գերակայությունը և պաշտպանել ընտրական գործընթացի ամբողջականությունը։ Այս ընտրությունները ևս մեկ կարևոր քայլ են երկրի ժողովրդավարական զարգացման ճանապարհին և վերահաստատում են Հայաստանի հանձնառությունը ժողովրդավարական կառավարմանը, ինչպես նաև իր քաղաքացիների ինքնիշխան իրավունքին՝ ազատ և ժողովրդավարական ընտրությունների միջոցով որոշելու իրենց ապագան։ Ընտրությունների արդյունքները և Հայաստանի Հանրապետության վարչապետին ցուցաբերված աջակցությունը հստակորեն արտահայտում են Հայաստանի ժողովրդի կամքը՝ շարունակելու խաղաղության և բարեկեցության ուղին»։
