ԱՄՆ նախագահ Դոնալդ Թրամփն Իսրայելի վարչապետ Բենիամին Նեթանյահուի հետ հեռախոսազրույցից հետո հայտարարել է, որ Բեյրութ շարժվող իսրայելական զորքերը հետ են շրջվել։ Այս մասին Թրամփը գրել է Truth Social հարթակում հունիսի 1-ի երեկոյան։
«Ես շատ արդյունավետ զրույց ունեցա Իսրայելի վարչապետ Բիբի Նեթանյահուի հետ, և Բեյրութ զորքեր չեն գնա, իսկ ճանապարհին գտնվող զորքերն արդեն հետ են շրջվել», – նշել է Թրամփը:
Նա հավելել է, որ բարձրաստիճան ներկայացուցիչների միջոցով «շատ լավ զրույց» է ունեցել նաև լիբանանյան «Հեզբոլլահ» շարժման հետ։
«Նրանք համաձայնել են, որ բոլոր կրակոցները կդադարեցվեն՝ Իսրայելը չի հարձակվի նրանց վրա, և նրանք չեն հարձակվի Իսրայելի վրա», – հավելել է Սպիտակ տան ղեկավարը:
Մեկ այլ գրառման մեջ Թրամփը նշել է, որ Իրանի հետ բանակցություններն ինտենսիվ տեմպերով շարունակվում են։
Նեթանյահուն իր հերթին X-ում գրել է, որ Թրամփի hետ զրույցում նրան հայտնել է, որ եթե «Հեզբոլլահ»-ը չդադարեցնի իսրայելական քաղաքների և քաղաքացիների վրա հարձակումները, ապա Իսրայելը «կհարվածի Բեյրութում ահաբեկչական թիրախներին»։
«Մեր այս դիրքորոշումն անփոփոխ է։ Միևնույն ժամանակ, Իսրայելի պաշտպանության ուժերը կշարունակեն գործել Լիբանանի հարավում, ինչպես պլանավորված էր», – հավելել է նա։
Լիբանանի նախագահ Ժոզեֆ Աունի գրասենյակն էլ հայտնել է, որ երկրի իշխանությունները հաստատում են ստացել, որ «Հեզբոլլահ»-ն ընդունել է գրոհները փոխադարձաբար դադարեցնելու ԱՄՆ-ի առաջարկը։
Հունիսի 1-ի առավոտյան Իսրայելի վարչապետը հրահանգել էր հարվածներ հասցնել Բեյրութի հարավային արվարձաններին՝ ի պատասխան «Հեզբոլլահ»-ի կողմից Իսրայելի ուղղությամբ հարձակումների։
Իրանական լրատվամիջոցներն էլ գրել էին, որ Վաշինգտոնի հետ անուղղակի բանակցությունները դադարեցվում են Լիբանանում Իսրայելի ռազմական գործողությունների պատճառով։
Իրանը նաև նախազգուշացրել է, որ իսրայելական հարվածները «Հեզբոլլահ»-ի դեմ կարող են սպառնալ ԱՄՆ-ի և Իրանի միջև հրադադարին։ BBC-ն նշում է, որ Իրանի արտգործնախարար Աբբաս Արաղչիի խոսքով՝ Վաշինգտոնի հետ համաձայնությունը ենթադրում է հրադադար բոլոր ճակատներում, այդ թվում՝ Լիբանանում, հետևաբար, ճակատներից մեկում հրադադարի խախտումը նշանակում է հրադադարի խախտում բոլոր ճակատներում։
Անցած հանգստյան օրերին Իրանի և ԱՄՆ-ի միջև լարվածությունը սրվել է նաև Հորմուզի նեղուցում։ ԱՄՆ-ն հայտարարել է, որ հարվածել է իրանական ռազմական օբյեկտներին, իսկ Թեհրանը նշել է, որ պատասխանել է՝ թիրախավորելով Քուվեյթում գտնվող ամերիկյան ռազմաբազաներից մեկը։
