Իրանի արտաքին գործերի նախարարության խոսնակ Էսմայիլ Բաղային, մեկնաբանելով Պակիստանի ջանքերով ԱՄՆ-ի կողմից հրադադարի երկարաձգումը, հայտարարել է, որ երկիրն «ուշադիր հետևում է քաղաքական ասպարեզում տեղի ունեցող զարգացումներին»։ Այս մասին հաղորդում է իրանական IRNA գործակալությունը:
Բաղային նշել է, որ Իրանը կձեռնարկի «անհրաժեշտ և համապատասխան միջոցներ՝ երկրի ազգային շահերն ու անվտանգությունը պաշտպանելու համար»: Նրա խոսքով՝ Իրանի զինված ուժերը գտնվում են լիարժեք մարտական պատրաստության վիճակում, և երկիրը կշարունակի վերահսկել իրավիճակը թե՛ մարտադաշտում, թե՛ բանակցություններում։
Նա նաև անդրադարձել է Վաշինգտոնի հետ հետագա բանակցությունների հնարավորությանը։
«Դիվանագիտությունն ազգային շահերն ու անվտանգությունն ապահովելու գործիք է, և երբ մենք եզրակացնենք, որ առկա են այս գործիքն օգտագործելու անհրաժեշտ և ողջամիտ պայմաններ, մենք գործողություններ կձեռնարկենք», – ասել է նա:
Պաշտոնյան կրկին նշել է, որ Իսլամական Հանրապետությունը մտադիր է պատասխանատվություն պահանջել երկրի ենթակառուցվածքներին հարվածների համար և կշարունակի պահանջել փոխհատուցում պատճառված վնասի համար։
