Chrome դիտարկիչների նոր տարբերակներում կլինի նոր գործիք, որը թույլ է տալիս օգտատերերին երկու տարբեր համակարգիչներից կապվել միմյանց հետ: Այս գործիքից օգտվելու համար անհրաժեշտ է միայն Chrome դիտարկիչ: Այս մասին ասվում է Chrome-ի պաշտոնական բլոգում:
Chrome Remote Desktop կոչվող գործիքը հիմա գտնվում է բետա փորձարկման մեջ և կգործի Windows, Mac OS և Linux օպերացիոն համակարգերի հիման վրա, ինչպես նաև այսպես կոչված քրոմբուքերի վրա, որոնք գործում են Chrome OS օպերացիոն համակարգով: Ընկերությունում ասել են, որ այս գործիքը նախատեսված է գործարարների և բիզնես ոլորտի մարդկանց համար, որոնց անհրաժեշտ են ուղիղ հաղորդակցման միջոցներ:
Ուղիղ տեսա- և ձայնակապ ապահովելու համար Google-ը դեռ 2010 թ. գնել էր Global IP Solutions ընկերությունը: Սակայն սրանից ոչ միայն այս ծրագիրն է շահում, այլ նաև հնարավորություն է ստեղծվում այլ ընկերությունների վաճառել WebRTC ծրագիրը, որն ունի կոմունիկացիոն բազմաթիվ հնարավորություններ: Տեխնիկապես այն կարող է գործել նաև Opera և Mozilla դիտարկիչներում: Այս ծրագիրը կարող է նաև դուր չգալ այն պետություններին, որոնք համացանցային գրաքննություն են անցկացնում:
