Իրանի նախագահ Մահմուդ Ահմադինեջադը քննադատել է Թուրքիայի ղեկավարությանը այն բանի համար, որ նա թույլատրել է իր տարածքում ՆԱՏՕ-ի ռադար տեղադրել:
Ինչպես հաղորդում է BBC-ն, հեռուստահարցազրույցում Ահմադինեժադը կարծիք է հայտնել է, որ այդ ռադարը նախատեսված է Իրանի և Իսրայելի միջև ռազմական հակամարտության դեպքում վերջինիս պաշտպանության համար: Թուրքիայի իշխանությունները նախագծին համաձայնություն էին տվել անցյալ ամիս` հայտարարելով, թե դա ուղղված չէ կոնկրետ որևէ երկրի դեմ:
Ռադարը կտեղադրվի Մալաթիա մարզում` Իրանի սահմանից 540 կմ հեռավորության վրա:
Ավելի վաղ Վրաստանի նախագահ Միխեիլ Սաակաշվիլին կոչ էր արել ԱՄՆ-ին ռադար տեղադրել հենց Վրաստանում:
Թուրքիայի և Իսրայելի հարաբերությունները վերջին ամիսներին զգալիորեն վատացել են: Թուրքիան պահանջում է ներողություն խնդրել «Ազատության նավատորմի» վրա հարձակման համար, Իսրայելը չի համաձայնում` պատճառաբանելով, որ դեպքը հետաքննած ՄԱԿ-ի հատուկ հանձնաժողովի զեկույցը այդպիսի կետ չի նախատեսում:
