«Ոստիկանությունը, հնարավոր է, հիմք է նախապատրաստում խաղաղ ցուցարարների վրա հարձակվելու համար, ինչպես դա արեց 2008 թ. փետրվար-մարտ ամիսներին»,- այսօր «Առաջին լրատվական»-ի հետ զրույցում ասաց «Իրավունքի և ազատության կենտրոն» ՀԿ-ի
նախագահ, իրավապաշտպան Վարդան Հարությունյանը` խոսելով երեկ ՀՀ ոստիկանության տարածած հաղորդագրության մասին:
Նշենք, որ հաղորդագրության մեջ ասվում է, որ Ազատության հրապարակում ընթացող շուրջօրյա հանրահավաքներն ու նստացույցն անօրինական են, և դրա մասնակիցները ենթակա են օրենքով նախատեսված պատասխանատվության, եթե օրենքով սահմանաված կարգը կամ այլոց իրավունքները խախտեն:
Մեկնաբանելով ոստիկանության հաղորդագրության այս հատվածը` Վ. Հարությունյանն ասաց, որ երևի «այլոց իրավունք խախտել» նշելով՝ ոստիկանությունը նկատի ունի, որ նստացույցը, հնարավոր է, խանգարի Ազատության հրապարակի անցորդներին կամ պարզապես քաղաքացիներին:
«Այսինքն` ցանկացած պահի կարող են ասել, որ տեղադրված վրանները խանգարում են քաղաքացուն, ով զբոսնում է հրապարակով, իբրև թե խոչընդոտում են այդ քաղաքացու սահմանադրական իրավունքը: Սա կարող են ընդունել, որպես հիմք և իրականացնել այն, ինչ արեցին 2008 թվականի փետրվար-մարտ ամիսներին` հարձակվել խաղաղ ցուցարարների վրա»,- մեկնաբանեց իրավապաշտպանը` հնարավոր համարելով մեկ այլ վարկած ևս: Նրա կարծիքով` այստեղ խոսքը ոչ թե օրենքի մասին է, այլ ոստիկանության և խաղաղ ցուցարարների փոխհարաբերությունների:
«Մշտապես հրապարակում բարձրախոսով նախազգուշացումներ տարածելով` փորձում են մարդկանց նյարդերի վրա ազդել, ոստիկանության նպատակը ոչ թե օրենքին համապատասխան գործողություններ կատարելն է, այլ ցուցարարներին հունից հանելը: Միայն այն, որ շրջակա սրճարանների աշխատանքը սահմանափակվեց, որպեսզի ցուցարարները չկարողանան սուրճից օգտվել և որևէ բան ուտել…, փակվել են անգամ տարածքի զուգարանները, որ ցուցարարները չկարողանան օգտվել: Այս ամենն ապացուցում է, որ ոստիկանության և ՀՀ իշխանությունների գործողությունները ոչ թե օրենքին հետևելն է, այլ մարդկաց պարզապես նյարդային և անհարմար կացության մեջ դնելը»,- ասաց իրավապաշտպանը: Սակայն նա նաև նշեց, որ, ըստ գործող օրենքի, ոստիկանությունն իրավունք ունի ցրել նստացույցը, բայց այս դեպքում խոսքը օրենքի ճիշտ իրացման մասին չէ:
Ըստ Վ. Հարությունյանի` ՀՀ քաղաքացին իրավունք ունի ըմբոստանալու և Սահմանադրությամբ իրեն տրված իրավունքներն իրականացնելու: «Որևէ բռնի գործողություն իշխանության կողմից արդարացում չի ունենա»,- ընդգծեց իրավապաշտպան Վարդան Հարությունյանը:
