Toyota-ն նախատեսում է GR Corolla սպորտային մոդելի արտադրության մի մասը տեղափոխել Միացյալ Թագավորություն՝ ներդնելով մոտ 56 միլիոն դոլար նոր արտադրական գիծ ստեղծելու համար, որը կսպասարկի Հյուսիսային Ամերիկայի շուկան, հայտնում է Reuters-ը։
Ըստ աղբյուրների՝ Toyota-ն որոշել է Ճապոնիայից դուրս բերել արտադրության մի մասը՝ օգտագործելու Միացյալ Թագավորությունում առկա արտադրական հզորությունները և կրճատելու մեքենաների առաքման սպասման ժամկետները։ Ընկերությունը նշել է, որ այս որոշումը կապված չէ ԱՄՆ նախագահ Դոնալդ Թրամփի կողմից ավտոմեքենաների ներմուծման համար սահմանված մաքսատուրքերի հետ։
Հիշեցնենք, որ այս ամիս Թրամփի վարչակազմը համաձայնել է Միացյալ Թագավորությունից ներմուծվող մինչև 100,000 ավտոմեքենայի համար մաքսատուրքը իջեցնել մինչև 10%։ Միևնույն ժամանակ, Ճապոնիան ջանքեր է գործադրում ԱՄՆ-ի կողմից բոլոր ավտոմեքենաների ներմուծման համար սահմանված 25% մաքսատուրքը վերացնելու ուղղությամբ։
Համաշխարհային ավտոարտադրողները բախվում են մաքսատուրքերի հետ կապված մարտահրավերների, ինչպես նաև խոշոր շուկաներում գործող արտանետումների տարբեր ստանդարտների և հաճախորդների պահանջների։
