Եգիպտոսի անվտանգության ուժերը ցրել են շաբաթ օրը Կահիրեի կենտրոնական Թահրիր հրապարակում հավաքված մի խումբ ցուցարարների, որոնք երկու օր է, ինչ գտնվում էին հրապարակում և հրաժարվում էին կամովին լքել այն: Այս մասին հաղորդում է EGYnews ինտերնետային կայքը:
Ոստիկանության տվյալներով՝ մի խումբ երիտասարդներ երկու օր առաջ հաստատվել էին Թահրիրի պուրակներից մեկում: Ցուցարարները քաղաքական որևէ ուժի կամ կուսակցության որևէ պահանջ չէին ներկայացնում:
Շաբաթ օրը Թահրիրում տեղակայված ոստիկանական ստորաբաժանումը ցուցարարներին հրամայել է լքել հրապարակը, ինչին ի պատասխան՝ վերջիններս քարեր են նետել ոստիկանների ուղղությամբ:
Ոստիկանական ուժերն, ի վերջո, ցրել են ցուցարարներին. նրանցից տասը ձերբակալված են:
Հիշեցնենք, որ ուրբաթ օրը Թահրիրում տեղի էր ունեցել հերթական «Հեղափոխության վերադարձը» անվանումով զանգվածային ակցիան, որին մասնակցել էր մոտ հազար մարդ: Ակցիան կազմակերպել էր «Եգիպտոսի հեղափոխական երիտասարդության կոալիցիան»: Ցուցարարները պահանջում էին փոփոխել ընտրությունների մասին օրենքը, վերացնել արտակարգ դրությունը և ԶԼՄ-ներին ազատություն տրամադրել:
