Ընթացիկ տարվա հոկտեմբերին արդեն Երկրի բնակչությունը, որը վերջին 50 տարիներին ավելացել է ավելի քան երկու անգամ, կարող է հասնել 7 մլրդ-ի, իսկ 2100 թ. այդ ցուցանիշը կարող է գերազանցել 10 մլրդ-ը: Այս մասին են վկայում ՄԱԿ-ի տնտեսական և սոցիալական հարցերով ժողովրդաբնակչության բաժնի կանխատեսումները: Ինչպես հաղորդում է РИА Новости-ն, թե կոնկրետ որ օրը Երկրի բնակչությունը կհատի խորհրդանշական 7 մլրդ-ի սահմանը՝ հայտնի չէ. որպես այդպիսի օր սահմանված է հոկտեմբերի 31-ը, երբ այդ պատմական իրադարձությունը կուղեկցվի մի շարք միջոցառումներով:
Մարդկության պատմության ընթացքում Երկրի բնակչության աճը բավականին դանդաղ է եղել, մարդկանց թիվը հասել է մեկ միլիարդի միայն 1804թ.: Սակայն դրանից հետո՝ 125 տարում բնակչության թիվը կրկնապատկվել է, իսկ 1800-2011 թթ. ընթացքում մարդկանց թիվը 7 անգամ ավելացել է: Երկրի վրա բնակչության աճն ապահովվում է հիմնականում զարգացող երկրների հաշվին: ՄԱԿ-ի տվյալներով, ամենաշատ բնակչություն ունեցող երկրների տասնյակում միայն երեք զարգացած երկիր կա` ԱՄՆ, Ռուսաստան և Ճապոնիա:
Բնակչության աճի այսպիսի տեմպերի պատճառը մասնագետները համարում են, այսպես կոչված, ժողովրդագրական անցումը. դա մի գործընթաց է, երբ բարձր ծնելիություն և բարձր մահացություն ունեցող հասարակությունը տնտեսական զարգացմանը զուգընթաց վերածվում է ցածր ծնելիություն և ցածր մահացություն ունեցող հասարակության:
Երբ այս կամ այն հասարակությանը հասանելի է դառնում ժամանակակից բժշկությունը, դրանում կտրուկ նվազում է մահացությունը, սակայն ծնելիությունը դեռ երկար ժամանակ բարձր է մնում: Ծնելիության մակարդակն աստիճանաբար սկսում է նվազել թոշակային համակարգի զարգացմանը զուգընթաց: Զարգացած երկրներն արդեն անցել են այդ փուլը, և դրանց մեծ մասում այժմ սկսվել է բնակչության նվազման փուլը:
ՄԱԿ-ի կանխատեսումներով՝ առաջիկա 40 տարիների ընթացքում մոլորակի բոլոր վայրերում բնակչության աճի տեմպերը զգալիորեն կնվազեն:
Բացի այդ, էականորեն կկրճատվի նաև մահացության և ծնելիության մակարդակը, ինչի հետևանքով կփոխվի երկրի բնակչության տարիքային կառուցվածքը: Այսպես, արդեն 2050 թ. աշխարհում մարդկանց կյանքի միջին տևողությունը կբարձրանա մինչև 76 տարեկան (2011 թ. տվյալներով` 69 տարեկան), ընդ որում՝ կյանքի տևողությամբ առաջատարներ կլինեն Հյուսիսային Ամերիկան և Օվկիանիան: Ընդհանուր առմամբ` տարեցների թիվը 2050 թ. կկրկնապատկվի:
