News Georgia-ի փոխանցմամբ՝ Լեհաստանում Վրաստանի արտակարգ և լիազոր դեսպան Նիկոլոզ Նիկոլոզիշվիլին վրացական «Ռուսթավի 2» հեռուստաընկերության եթերում ամփոփել է Վարշավայում ընթացող «Արևելյան գործընկերության» գագաթնաժողովի առաջին օրը։
Դեսպանը նշել է, որ Վրաստանի և ԵՄ-ի միջև խորացված ու համապարփակ ազատ առևտրի գոտւ ձևավորման մասին համաձայնագրի կնքման վերաբերյալ բանակցությունները կմեկնարկեն մինչև տարեվերջ.
«Կոնկրետ Վրաստանի պարագայում տվյալ հարցում գրանցվելու է առաջընթաց։ Մինչև տարեվերջ կսկսվեն ազատ առևտրի մասին համաձայնագրի կնքման բանակցությունները, ինչը կնպաստի Վրաստանի տնտեսական զարգացմանն ու ԵՄ-ի հետ մերձեցմանը։ Այդ համաձայնագիրը վրացական ընկերությունների համար ճանապարհ կհարթի դեպի եվրոպական շուկաներ»։
Հիշեցնենք, որ Վարշավայում գտնվող Վրաստանի փոխարտգործնախարար Թոռնիկե Գորդաձեն «Ռուսթավի 2» հեռուստաընկերության երեկվա եթերում հայտարարել էր, թե Վրաստանը կոնկրետ արդյունքներ է ակնկալում «Արևելյան գործընկերության» գագաթնաժողովից. «Գագաթնաժողովից մենք հստակ ազդանշաններ ենք ակնկալում Վրաստանի և ԵՄ-ի միջև ազատ առևտրի գոտու ձևավորման մասին։ Մենք սպասում ենք կոնկրետ ժամկետների հայտարարություններին, թե երբ են մեկնարկելու այդ մասին բանակցությունները։ Վրաստանը համարվում է «Արևելյան գործընկերություն» ծրագրում ներառված ամենահաջող երկրներից մեկը»։
