ԱՄՆ դաշնային դատավորը մերժել է Associated Press-ի (AP) միջնորդությունը՝ անհապաղ վերականգնել հասանելիությունը նախագահի մամուլի ասուլիսներին՝ միաժամանակ որոշում չկայացնելով աշխարհի գլխավոր լրատվական գործակալություններից մեկի և Դոնալդ Թրամփի վարչակազմի միջև վեճի վերաբերյալ: Այս գործով դատը շարունակվում է, և հաջորդ նիստը նշանակված է մարտի 20-ին:
Ավելի վաղ AP-ին արգելել էին մասնակցել մամուլի ասուլիսներին, մասնավորապես՝ այցելել Օվալաձև աշխատասենյակ, Մար-ա-Լագոյի նստավայր և լինել նախագահական ինքնաթիռում, քանի որ գործակալությունը հրաժարվել էր իր հոդվածներում և ռեպորտաժներում Մեքսիկական ծոցն անվանել «Ամերիկյան ծոց»՝ Թրամփի ստորագրած հրամանագրի համաձայն:
Անցյալ երեքշաբթի Թրամփը լրագրողներին ասել էր, որ AP-ի գործընկերներին մերժվելու է մուտք գործել այնքան ժամանակ, քանի դեռ նրանք «չեն հաշտվել «Ամերիկյան ծոց» անվանման հետ»: Սպիտակ տունը հայտարարել է, որ նախագահի մամուլի միջոցառումներին մասնակցելը «արտոնություն է, այլ ոչ թե օրինական իրավունք»:
Լրատվական գործակալությունում դատապարտել են մամուլի ազատության վրա «հարձակումը»՝ նշելով, որ լրագրողներին չի կարելի «բռնաճնշումների» ենթարկել այն բանի համար, որ իրենք են ընտրում, թե որ աշխարհագրական տերմիններն օգտագործեն: «Սահմանադրությունը թույլ չի տալիս ԱՄՆ նախագահին կամ կառավարության որևէ պաշտոնյայի ստիպել լրագրողներին կամ ցանկացած մեկին օգտագործել կառավարության պաշտոնական բառապաշարը՝ նորություններ հաղորդելու համար»,- դատական նիստի ժամանակ ասել է AP-ի փաստաբանը:
