Էգեյան ծովի Կիկլադյան արշիպելագի հունական կղզիներում, այդ թվում՝ Սանտորինիի մերձակայքում, վերջին երկու օրվա ընթացքում տեղի է ունեցել տարբեր ուժգնության 200 երկրաշարժ՝ առավելագույնը 4,5 մագնիտուդով: Այս մասին հաղորդում է Kathimerini պարբերականը՝ վկայակոչելով համապատասխան գերատեսչությունները։
Սանտորինի, Ամորգոս, Պարոս, Անտիպարոս և Նակսոս կղզիներում իշխանությունները կարգադրել են տեղակայել արտակարգ իրավիճակների արձագանքման ուժեր և փակել դպրոցներն ու մանկապարտեզները:
Սեյսմոլոգները չեն բացառում հետագա ուժեղ ստորգետնյա ցնցումները։ Փրկարարները կանխարգելման նպատակով վրաններ են տեղադրել մարդկանց ժամանակավորապես տեղավորելու համար:
Հյուրանոցների սեփականատերերին հանձնարարվել է միջոցներ ձեռնարկել շենքերի հնարավոր փլուզման ռիսկերը նվազեցնելու համար։ Տեղի բնակիչներին և զբոսաշրջիկներին հանձնարարվել է խուսափել շինությունների ներսում մեծ խմբերով հավաքվելուց։
Փետրվարի լույս 3-ի գիշերը սեյսմոլոգները հայտնել են 4,2 մագնիտուդով նոր երկրաշարժի մասին։
Իր հերթին Թուրքիայի կառավարությանն առընթեր Արտակարգ իրավիճակների կառավարման վարչությունը հայտարարել է, որ Էգեյան ծովում հունվարի 28-ից ի վեր երկրաշարժերի թիվը գերազանցել է 400-ը։ Ամենահզոր ցնցման մագնիտուդը կազմել է 4,8։
